Bi dîmen…dewleta Tirk li pêş çavên hikumeta Şamê û Moskovê sînoran ava dike

Dewleta Tirk a dagirker hewl dide herêmên ku li bakurê rêya M4 ya Eyn Îsayê ya li başûrê wê dagir kirine, bi 5 baregehên leşkerî ve yên bi dirêjahiya 15 kîlometreyan ve girê bide.

Dewleta Tirk a dagirker  ji Mijdara par ve 5 baregehên leşkerî li derdora bajarokê Eyn Îsayê li hember gundên Xalidiyê, Mielek, Hoşan, Mişêrfê û Seyda yên li ser rêya M4 ya ber bi kantona Kobanê ve ava kirin. Li gel wê jî di encama topbarana hovane ya dewleta Tirk a dagirker û çeteyên wê de şêniyên van gundan koçber bûn.

Hevserokê Meclisa Kantona Girê Spî Hemîd El-Ebid ji ajansa me re destnîşan kiribû ku kiryara lêkirina sînorên çêkirî li nava xaka Sûriyê, di çarçoveya berfirihekirin û rewakirina dagirkirina van herêman e. Li gel wê jî civaka navneteweyî, bi taybet DYA’yê û garantorê rûsî çavên xwe ji van sûc û kiryarên ku pêk tên re, digirin.

Hikumeta Şamê, tu helwest li hember hewldana dewleta Tirk a dagirker a birîna hermên ku li bakurê rêya M4 hatine dagirkirin, neda. Lê Navenda Lihevanînê ya Rûsyayê di 16’ê Adarê de fikarên xwe li ser tevgerên dewleta Tirk û avakirina baregehan li derdora Eyn Îsayê eşkere kirin.

Dewleta Tirk a dagirker di mehên borî de, ji baregehên xwe yên li kûrahiya xaka Sûriyê, derdora baregeh û nuqteyên leşkerî yên hevbeş ên leşkerên rûs û hêzên hikumeta Şamê yên li ser rêya M4 topbaran kirin, lê hêzên Rûsya û hêzên hikumeta Şamê bersiva êrişan neda.

(fr)

ANHA