Êzidiyên Helebê Çarşema Sor pîroz kir

 Pîrozbahî li Qada Şehîdan a li rojavayê taxa Şêxmeqsûd hat lidarxistin û bi sedan êzidiyên li Helebê, pêkhateyên taxê û endamên saziyên sivîl û partiyên siyasî beşdarê bûn.

Qada pîrozbahiyê bi wêneyên şehîdan, wêneyên rêber Abdullah Ocalan û peykerekî Laleş, hêkên rengîn hate xemilandin û meşale hatin pêxistin.

Hevseroka Mala Êzidiyan a taxên Şêxmeqsûd û Eşrefiyê yên Helebê Gulê Xezal, Çarşema Sor li tevahî gel û êzidiyên li seranserê cîhanê pîroz kir.

Gulê Xezal diyar kir ku ev meh ji bo civaka êzidî meheke pîroz e û di vê mehê de hemû pêkhateyên Xiristiyan, Misliman û Êzidî cejnên xwe pîroz dikin û got: “Ev meh ji bo hemû gelan pîroz e.”

Gulê Xezal berxwedana gel li Şehba û Şengalê li hemberî siyasetên qirkirinê yên dewletên zordest û di serî de dagirkeriya Tirk, silav kir û hêvî kir ku sala 2021`an bibe sala azadiya rêber Abdullah Ocalan û rizgarkirina hemû herêmên dagirkirî.

Piştre koma zarokan û koma ciwanan ên Mala Êzidiyan hin sirûdên olî li ser Çarşema Sor xwendin. Dûvre Mala Êzidiyan hêkên rengîn ku yek ji rê û resmên girîng ên cejnê ye, pêşkêş kirin.

Her wiha komên hunerî yên girêdayî Navenda Cemîl Horo ya Çand û Hunerê ya Helebê, koma Vejîn û Koma Yektiiya Hunermendan bi beşdariya hunermend Ehmed Xanî, stranên şoreşgerî û olî pêşkêş kirin.

Pîrozbahî bi gerandina govendê û stranên şoreşgerî bi dawî bû.

(cx)

ANHA