Li Dirbêsiyê merasîma bîranîna 63 şehîdan

Meclisa Malbatên Şehîdan a navçeya Dirbêsiyê bi beşdariya malbatên şehîdan û sedan şêniyan merasîma bîranîna 63 şehîdan li dar xist. Ew şehîd di demên cuda ji mehên Sibat û Adarê de di nava Tevgera Rizgariya Kurdistanê û şoreşa Bakur û Rojhilatê Sûriyê de gihaştin asta şehadetê.

NÛÇE

31 adar, 2021 19:33

HESEKÊ

Merasîma bîranînê li Goristana Şehîd Rustem Cûdî ya li gundê Berkevirê ya navçeya Dirbêsiyê û bi beşdariya bi sedan şênî, endamên saziyên sivîl û leşkerî li dar ket.

Merasîm bi deqeyeke rêzgirtinê dest pê kir û piştre bi navê Meclisa Malbatên Şehîdan a herêma Cizîrê Hesen Ubêd axivî û îşret bi rola şehîdan û berdêlên ji bo parastina welat dane, kir û got: "Şehîdan di oxira parastina welat, jiyana birûmet û aştiyane canê xwe da."

Ubêd bi vê yekö axaftina xwe bi dawî kir: "Heta pêkanîna armancên şehîdên ku canê xwe ji bo me daye, em şopdarên rêya şehîdan e."

Dûvre bi navê hêzên QSD`ê Umeran Orkêş axivî û da zanîn ku şehîd xwediyên şoreşê ne û ew wekî hêzên leşkerî erka şopandina rêya têkoşîn û armancên wan girtine ser milên xwe. Ew îro 63 şehîdan bi bîr tînin û careke din soza berxwedanê heta pêkanîna jiyaneke azad a ji bo gelên xwe didin.

Piştî merasîm bi dawî bû, endama Meclisa Malbatên Şehîdan Hojîn Hêris nasnameyên şehîdan xwendin û girseya gel diruşmên "Şehîd namirin" berz kirin.

(eh)

ANHA