Şêniyên Dêrikê sersaxî da malbata şehîd Mezlûm Efrîn

Bi sedan şêniyên Dêrikê û navçeyên wê berê xwe da Navenda Şehîd Bawer a Ciwanan da ku sersaxiyê bidin malbata şehîd Mihemed Ebdo (Mezlûm Efrîn).

Qada Navenda Şehîd Bawer bi wêneyên şehîdan û al û sembolên kurdî hate xemilandin. Di merasîma sersaxiyê de, endamê rêveberiya Meclisa Malbatên Şehîdan a Heqî Botan axivî û di şexsê şehîd Mezlûm de hemû şehîdên tevgera rizgariya Kurdistanê û şehîdên berxwedana Garê bi bîr anîn.

Heqî Botan diyar kir ku şehîd Mezlûm Efrîn li ser fikrê tevgera rizgariya Kurdistanê meşiya û gihaşt asta şehadete û bû sembolek ji sembolên şoreşa Rojava.

Endama rêveber a Kongreya Star a Dêrikê Zulfe Bidûr jî wiha axivî: “Em ji vê derê bang li mirovahiyê û rêxistinên hiqûqî dikin ku li hemberî tecrîda li ser rêber Abdullah Ocalan helwesta xwe diyar bikin.”

Bi navê Partiya Yekitiya Demokratîk (PYD) jî Xelîl Behro axivî û diyar kir ku hefteya dawîn ji meha Adarê bi Hefteya Lehengiyê tê nasîn û wiha lê zêde kir: “Şehîd Mezlûm Efrîn şehadeta Mazlûm Dogan anî bîra min ku bû meşaleyeke azadiyê. Şehadeta Mazlûm Dogan li girtîgeha Amedê derbe li dewleta Tirk a faşîst xist û moral da gelên herêmê.”

Bi navê meclisa navçeya Til Koçerê jî Salih El-Keno wiha axivî: “Fikrê Rêveberiya Xweser ku li ser azadî û demokrasiyê ye, li ser sîstemên faşîst xetere ye.”

Piştre endamê Meclisa Malbatên Şehîdan a navçeya Dêrikê Mehmûd Ehmed wesîqeya şehîd Mezlûm Efrîn xwend û radestî malbata wî kir.

Bi navê malbata şehîd Mezlûm jî Qasim Ebdo axivî û soza şopandina rêya şehîdan heta pêkanîna armancên wan da.

(cx)

ANHA