‘Pergalên serdest têkoşîna jinan li ser xwe xeterî dibîne’

Bi boneya 8’ê Adarê rêzeçalakî li tevahî bajarên Bakur û Rojhilatê Sûriyê li dar ketin.

KOBANÊ

Kongreya Star a Kobanê meşek li dar xist, meş ji Qada Herdemê ve dest pê kir û  li Qada Jina Azad a li naverasta bajêr vegerî mîtîngekê.

Di mîtîngê de, bi navê rêxistinên jinan ên li bajêr, Sara Xelîl axivî û got: "Têkoşîna jinan, bingeha destpêkirina tevgera jinên ciwan e ku li hember tevahî hêzên dijberî jinan disekine. Divê bi tevahî rêbazan li hemberê bisekinin û têkoşîna xwe bilind bikin."

Sara Xelîl destnîşan kir ku dewletên ku piştevaniya terorê dikin, her tim li hember azadiya jinên têkoşer disekinin, ji ber ev dewlet xwedî rejîmên radîkalî  in û jinan dijminê xwe dihesibînin.

Sara Xelîl banga xurtkirina têkoşîna azadiya jinan kir.

Li aliyekî din jî berdevka Hêzên Parastina Civakî-Jin (HPC-Jin) Sozdar Xelîl Roja Jinan a Cîhanê li tevahî jinan bi taybet li tevahî jinên di eniyên şer de pîroz kir û got: "Divê em erka ku dikeve ser milê me bi cih bînin û jin û civakê biparêzin."

HESEKÊ

Li bajarê Hesekê bi pêşengtiya Hêzên Parastina Civakî ya Jinan (HPC-JIN) bi sedan jin meşek li dar xist.  Jinan ku alên Kongreya Star û HPC`ê bilind kiribûn ji pêşiya parka Rêber Apo ya li taxa Nasira dest bi meşê kirin.

Meş li tevahî kolanên bajêr geria û ber bi  Navenda Komîteya Jînegeh û Şaredariyan a li taxa Kelasê çû û li wir vegerî mîtîngê. Piştre Koordînatora Kongreya Star a Hesekê Lîlav Hisên axivî.

Lîlav Hisên Roja Jinan a Cîhanê li tevahî jinan pîroz kir û wiha got: "Roja Jinan a Cîhanê ne rojeke normal û ji rêzê ye, lê belê ev roja berxwedan û têkoşîna li dijî zihniyeta desthilat û baviksalarî ye. Bi sedan jin di vê oxirê de heta roja îro şehîd bûne."

Bi navê HPC’ê Nesrîn Mecdel destnîşan kir ku ew li hember dijmin û êrişkarê herî mezin e, ew jî dewleta Tirk e ku li dijî jinan e û da zanîn ku di tevahî cîhanê de jin di azar, zilm û mehrûmkirinê re derbas bûne. Lê belê jinên Bakur û Rojhilatê Sûriyê tevahî sûcên li dijî wê şikandin û mafên xwe bi dest xistin.

Nesrîn Mecdil diyar kir ku jinan ji bo şoreşa xwe qurbanî da û hîna jî didin û tevahî cîhan dizane ku şoreşa jina a li Bakur û Rojhilatê Sûriyê bi ser ketiye.

Meş bi diruşmên silavkirina berxwedana jinan bi dawî bû.

TIRBESPIYÊ

Ji bo pîrozkirina hatina Roja Jinan a Cîhanê, şandeyek ji Kongreya Star a Tirbespiyê ya kantona Qamişlo serdana saziyên li navçeyê kir.

Şande ji jinên pêkhateyên Kurd, Ereb û Suryan pêk dihat serdana saziyên Rêveberiya Xweser, TEV-DEM’ê û nivîsgehên partiyên; PYD’ê, Partiya Kesek a Kurdistanî û Partıya Aştiya Demokratîk ya Kurdistanî, kir.

Endamên Kongreya Star di serdanên xwe de, li ser şoreşa Bakur û Rojhilatê Sûriyê axivî û got şoreşê pêngaveke baştir di dîroka jinan de pêk anî û diyar kirin ku jinan bi saya fikirê rêber Abdullah Ocalan cihê xwe yên xwezayî di civakê de girt.

Endamên saziyan spasiya şandeyê kir û Roja Jinan a Cîhanê li wan pîroz kir.

DÊRIKÊ

Bi heman boneyê, Kongreya Star a Dêrikê, ji bo pêşwazîkirina Roja Jinan a Cîhanê dest bi xemilandina kolan, qad û têketina bajêr kir.

Endamên Kongreya Star berê xwe da qada şehîdan a li naverasta bajêr, da ku bi wêneyên têkoşer û alên kurdî bixemlînin.

(fr)

ANHA