Çalakiyên Hefteya Çandî bi dawî bûn

Di dawiya çalakiyên Hefteya Çandî de şahiyek li avahiya Navneda Çand û Hunerê hat lidarxistin. Nûnerên  Meclisa Sivîl a Reqayê, rûspî û şexên eşîrên herêmê, wêjevan û rewşenbîrên Reqayê di şahiyê de amade bûn.

Sînevîzyonek li ser çalakiyên Hefteya Çandî, ji pêşangeha wênexêziyê, şano, pêşkêşkirina fîlm, semîner û rûniştinên folklorî hat pêşandan.

Piştre Hevseroka MSD'ê Emîne Omer bixêrhatina mêvanan kir û kêfxweşiya xwe bi vegera çalakiyên çandî li bajarê Reqayê ku bi paytexta çandê tê nasîn, anî ziman. Her wiha Emîne Omer li ser rewşa çandî ya Reqayê û dema di bin serweriya DAIŞ’ê de bû axivî.

Nûnerên MSD'ê Emîne Omer, Xelîl Xemîs û Selam Hisên, kesên ku hefteya çandî bi ser xistine, xelat kirin.

Piştre ji bo her yek ji van nivîskaran merasîmek îmzekirinê hate çêkirin; Dilşad Murad ji bo pirtûka xwe "Ideolojiya Qirkirina Etnîkî", nivîskar Amir Farso ji bo pirtûka xwe ya şanoyê"Helbestvan û Celad" û nivîskar Celaa Hemzawî ji bo pirtûka "Ji bo kê".

Şahî bi beşdarbûna gelek stranbêjên gelêrî yên Reqayê û pêşkêşkirina helbestan bi dawî bû.

Di Hefteya Çandî de, rêzçalakiyên çandî wek kurtefîlm, şanoya (siya mêrekî) ya Deham El-Setam, şanoya (gulên sor layîqî general in) ya Fîras Remedan, hatin pêşkêşkirin. Her wiha di çalakiyê de bal li ser nivîsgeha Bor Seîd ku kevntirîn nivîsgeh e û nûnertiya çandê di dîroka Reqayê de dike, hat kişandin.

(dm)

ANHA