Ji bo şehîdê berxwedana Garê Seydo Refîq merasîmek hat lidarxistin

Meclisa Malbatên Şehîdan a Kantona Efrînê bi merasîmekê nasnameya gerîlayê HPG'ê Seydo Refîq (Hogir Neasan) ê ku di berxwedana Garê de şehîd bûye  eşkere kir. Merasîm li qada kampa Serdemê ya navçeya Ehdasê ya kantona Şehbayê bi amadebûna bi hezaran şêniyên herêma Efrînê hate lidarxistin.

Merasîma bi guhdarkirina qeyda dengê şehîd Seydo Refîq dest pê kir. Şehîd Seydo behsa komkujiya ku dewletên kapîtalîst li dijî gelê wî pêk anîne, çareseriyên ku rêber Abdullah Ocalan pêşniyar kirine û girîngiya xurtkirina têkoşînê li hemberî siyasetên dewleta Tirk a faşîst dike.

Piştî deqeyek rêzgirtin, Meclisa Malbatên Şehîdan nasnameyên gerîlayên HPG'ê yên di meha Sibatê de di berxwedana Garê de şehîd bûne, eşkere kirin. Nasnameyên şehîdan wiha ne Kamûran Ataman (Şoreş Beytuşşebap), Ferhat Aslan (Seyfî Polat), Ewnî Mahmûd (Delîl Kobanî), Îbrahîm Muhemed Osman (Rêber Kobanî), Erselan Xanîzade (Erdal Rojhilat), Emrah Ordû (Xeyrî Çewlik),  Mehmet Alî Algor (Arhat Amed), Nedîm Kiliç (Cûdî Serhat), Gokhan Kol (Avareş Wan),  Ergîn Dûrmûş (Bawer Elkê), Sefkan Kaya (Argeş Ronî), Bayram Elhaman (Rojhat Mûsyan), Cabbar Îsmaîl Muhemed (Xabûr Dêrik), Gelhat Tolhildan.

Piştre, endamê rêveber ê Meclisa Malbatên Şehîdan Fewzî Mistefa axivî, sersaxî ji malbata şehîd Seydo û tevahî şêniyên Efrînê re xwest û behsa berxwedana dîrokî a ku gerîlayên HPG'ê li Garê raber kirine ku planên dagirkeriya Tirk têk birin, kir.

Hevseroka Meclisa Rêveber a Herêma Efrînê Şîraz Hemo li ser têkçûna dewleta Tirk di berxwedana Heftanînê û Eyn Îsayê de axivî û diyar kir ku dewleta Tirk a dagirker bi hevkariya PDK'ê  xwest çiyayên Garê dagir bike, lê bi saya berxwedana gerîlayan planên wan têk çûn.

Şîraz di dawiya axaftina xwe de destnîşan kir ku berxwedan û têkoşîn rêya yekane ya rizgarkirina Efrîn û tevahî herêmên Sûriyê yên dagirkirî ye.

Endamê Komîteya Perwerdeya Civaka Demokratîk a kantona Efrînê Mihemed Mistefa nasnameya şehîd Seydo xwend û radestî malbata wî kir.

Merasîm bi berzkirina siloganên dilsoziya bi şehîdan re û silavkirina berxwedana Efrîn û Garê bi dawî bû.

(dm)

ANHA