Çalakiya konvedanê di roja xwe ya sêyemîn de didome

Çalakiya konvedanê ku ji aliyê Tevgera Ciwanên Şoreşger a Sûriyê û Yekitiya Jinên Ciwan li bajarê Dêrikê ji bo piştgiriya berxwedana HPG`ê li hember êrişên dewleta Tirk li ser Herêmên Parastinê yên Medyayê di roja 3`yemîn û dawîn de didome.

Endamên Hêzên Ewlekariya Hundirîn, hêzên Hewarî, Trafîk, Meclilsa Malbatên Şehîdan, saziyên civaka sivîl ên herêma Dêrik a kantona Qamişloyê beşdarî konê çalakiyê bûn.

Di bin konê çalakiyê de hevseroka meclisa herêma Dêrikê Zulfa Bedro wiha axivî: "Ev meh ji gelê Kurd û gelên bindest re meheke reş e."

Zulfa Bedro diyar kir ku dîlgirtina rêber Abdullah Ocalan hedefgirtina gelên azadîxwaz e û ji ber wê jî divê hemû gel û pêkhateyên herêmê xwe bi rêxistin bikin û asta têkoşînê li dijî dewleta Tirk a faşîst û çeteyên wê, bilind bikin.

Paşê ji rêveberên Kongreya Star Şadiya Yûsif êrişên artêşa Tirk a dagirker ên li ser Başûrê Kurdistanê şermezar kirin û tekez kir ku êrişên artêşa Tirk wan natirsîne lê belê israra wan a bilindkirina têkoşînê zêde dike.

Her wiha ji rêveberên Hêzên Ewlekariya Hundrîn a Jin a navçeya Dêrikê Cûheyna El-Yûsif tekez kir ku rejîma Tirk a faşîst sedema êriş û komployên li dijî gelên herêmê ye.

Bi navê pêkhateyên Suryan jî endama Kongreya Star Seydî Hena êrişên dewleta Tirk ên li ser herêmên Bakur û Rojhilatê Sûriyê û herêma Garê û Şengalê, şermezar kirin.

Tê payîn ku çalakî îro di saetên êvarê de bi daxuyaniyekê bi dawî bibe.

(bx)

ANHA