ꞌKomploya navneteweyî rêyeke nû ya berxwedanê ji gelên azadîxwaz re vekir'

Di 9`ê Cotmeha 1998`an dewletên navneteweyî komployeke li dijî rêber Abdullah Ocalan pêk anîn û di encamê de roja 15'ê Sibata 1999'an rêbertî hate girtin û niha jî di girtîgeha Îmraliyê de di tecrîdeke giran de ye.

Têkildarî komployê Kongreya Star bi hevkariya Partiya Yekitiya Demokratîk (PYD) li navenda Baqî Xido ya Çand û Hunerê ya bajarê Kobanêcivînek ji gel re çêkir. Bi dehan şênî beşdarî civînê bûn.

Civîn bi rêzgirtinê dest pê kir, piştre Endama Koodînasyona Kongreya Star a Herêma Firatê Rewşen Hacim axivî û got, komplo di şexsê rêber Abdullah Ocalan de dest pê kiriye hîn jî li hemû herêmên Kurdistanê berdewam dike, isbata vê yekê jî êrişên dewleta Tirk ên li ser herêmên Bakur û Rojhilatê Sûriyê, guhertina demgorafîk a bi armanca qirkirina gelê Kurd, qirkirina çandî û etnîkî ye.

Rewşen diyar kir ku komplo ne tenê li dijî rêbertî ye, di heman demê de li dijî hemû gelê bindest e û gelên ku banga azadiya rêber Abdullah Ocalan dikin.

Endamê PYD`ê şaxê herêma Firatê Ehmed Şêxo jî axivî û destnîşan kir ku Kompolya Navneteweyî ya li dijî rêber Abdullah Ocalan rihê berxwedanê yê li cem gelê Kurd zindî kir, rêbertî deriyê azadî û berxwedanê vekir, her çi qasî di nav çar dîwaran de ye, lê ji bo gelê azadîxwaz fikirekî nû pêş xist.

Şêxo di dawiyê de bang li gelê Bakur û Rojhilatê Sûriyê kir ku projeya neteweya demokratîk bi ser bixin, ji ber ku mafên hemû gelan diparêze, destkeftiyên Şoreşa 19`ê Tîrmehê biparêzin û rêya berxwedanê ya rêber Abdullah Ocalan berdewam bikin.

Endama Koodînasyona Kongreya Star a Kantona Kobanê Nûdem Şîlan axivî got:"Siyaseta qirkirinê ya li dijî gelê Kurd ne cara yekemîn e, di şexşê rêber Abdullah Ocalan de hate destpêkirin û hîn jî li her çar parçeyên Kurdistanê li dijî gelê Kurd sûc têne kirin, lê bi saya fikir û felsefeya rêbertî hemû komplo têk çûn."

Civîn bi sloganên silavkirina berxwedana girtîgehan, bijî Şoreşa Rojava û bê serok jiyan nabe" bi dawî bû.

Ev civîn di çarçoveya rêzecivînên ku Koodînasyona Kongreya Star û PYD`ê ji 31`ê meha derbasbûyî ve li dar dixin, pêk tê û dê ev civîn heta 15`ê vê mehê berdewam bike.

(eh)

ANHA