Koordînasyona Jinan bû beşek ji sazûmaniya Rêveberiya Xweser

Meclisa Giştî ya Rêveberiya Xweser di civîna xwe ya asayî de Koordînasyona Jinan wekî beşek ji sazûmaniya Rêveberiya Xweser a Bakur û Rojhilatê Sûriyê pejirandin.

5 sibat, 2021 18:17

NAVENDA NÛÇEYAN

Meclisa Giştî ya Rêveberiya Xweser a Bakur û Rojhilatê Sûriyê duh civîna xwe ya asayî ya hejmara 33'an bi beşdarbûna meclisên qanûsaz ên tevahî rêveberiyên xweser û sivîl û seroka Desteya Rêveber a MSD'ê Îlham Ehmed li dar xist.

Di civînê de raporên Meclisa Giştî, meclîsên qanûnsaz ên rêveberiyên xweser û sivîl ên Bakur û Rojhilatê Sûriyê hatin xwendin.

Îlham Ehmed, rewşa siyasî nirxand û nêzîkatiyên Rêveberiya Xweser ji merc û guhertinên ku rû didin şîrove kir.

Beşdaran rewşa rêxistinî nîqaş kirin. Jozef Lehdo wekî cîgirê hevserokatiya Meclisa Rêveber a Rêveberiya Xweser a Bakur û Rojhilatê Sûriyê li şûna Elîzabeth Gewriyê sond xwar.

Bi erêkirina beşdaran, Koordînasyona Jinan bû beşek ji sazumaniya Rêveberiya Xweser a Bakur û Rojhilatê Sûriyê.

Her wiha xebatên meclîsên qanûnsaz ên rêveberiyên xweser û sivîl ên Bakur û Rojhilatê Sûriyê û pirsgirêkên ku di sala 2020'an de derketin, hatin nirxandin û ji bo sala nû gelek pêşniyar hatin kirin.

ANHA