Koçberên ji Minbicê ji kampa Holê derketin

Ji bo pêkanîna biryara ku Rêveberiya Xweser a Bakur û Rojhilatê Sûriyê ku di civîna 5'ê Cotmeha 2020'an a li gel Meclisa Sûriyê Demokratîk, Desteya Kar û Barên Civakî û Desteya Hundirîn de li dar xist, koçberên ji herêmên Bakur û Rojhilatê Sûriyê beş bi beş ji kampa Holê derdikevin.

Piştî ku navên malbatên ku dixwazin ji kampê derkevin, hate tomarkirin û belgeyên wan ji aliyê rêveberiyê kampê ve hatin piştrastkirin, îro beşa 9'emîn a koçberan ji kampê derket.

Di nav beşa 9'mîn de 67 malbat (236 kes) hene, piraniya wan zarok û jinên ji bajarê Minbicê ne.

Rêveberiyê kampê destnîşan kir ku niha navên koçberên din ên ku dixwazin ji kampê derkevin, tên tomarkirin.

Her wiha ji bo malbat bên parastin û radestî xizmên wan werin kirin, Hêzên Ewlekariya Hundirîn dê bi malbatan re biçin heta bajarên wan.

Li gorî rêveberiyê kampê, hejmara giştî ya malbatên ku li kampê dimînin, wiha ye: Koçberên ji Sûriyê; 6 hezar û 32malbat (21 hezar û 843 kes), koçberên ji Iraqê; 8 hezar û 277 malbat (30 hezar û 748 kes) û yên biyanî; 2 hezar û 565 malbat (8 hezar û 705 kes). Hejmara giştî ya malbatên li kampê dimînin tevî yên ku derketine 16 hezar û 874 e (61 hezar û 296 kes).

(dm)

ANHA