Şêniyên Efrînê li dijî dagirkeran meşek li dar xist

Meclisa kantona Efrînê meşek li dar xist. Bi sedan şêniyên navçeya Ehres, Ehdas û Kampa Serdemê tev li meşê bûn. Meş bi boneya salvegera 3`yemîn a êrişên dewleta Tirk û çeteyên wê yên li dijî kantona Efrînê û berxwedana şêniyan li dijî êrişan, hat lidarxistin.

Şênî tevî rewşa hewayê û baranê li ser rêya di navbera Kampa Serdem û gundê Til Qerah ê girêdayî navçeya Ehdas a kantona Şehbayê de kom bûn.

Meş li qada kKampa Serdem veguherî mîtîngê. Di mîtîngê de endama Meclisa Malbatên Şehîdan a kantona Efrînê Asiya Ebid axivî û got Rûsya û civaka navneteweyî berpirsên êrişên dewleta Tirk ên li dijî kantona Efrînê û sûcên li dijî niştecihên herêmên dagirkirî ne.

Asya îşaret bi berxwedana şêniyên Efrînê kir û piştrast kir ku ew ê berxwedana xwe berdewam bikin û li hember hemû rewşên zehmet bisekinin heta Efrînê ji destê dagirker û çeteyan rizgar bikin.

Her wiha endama Kongreya Star a herêma Efrînê Nemet Elîko behsa rola girîng a jinan di berxwedana Efrînê de kir û wiha got: "Berxwedana Serdemê şahidê rola sereke ya jinên Efrînê di eniyên şer de li dijî çeteyên artêşa dewleta Tirk e."

Namet got rizgarkirina Efrînê ji dewleta Tirk a dagirker dê bi pêşengiya jinên azad pêk bê.

Paşê endamê Meclisa Kampa Serdemê Reşîd Qeblan diyar kir ku êrişa dewleta Tirk a li dijî Efrînê berdewama Komploya Navneteweyî ya li dijî rêber Abdullah Ocalan e. Qeblan piştrast kir ku ew li ser rêya neteweya demokratîk dimeşin û ew ê bi rihê berxwedan û têkoşînê Efrînê rizgar bikin.

Mîtîng bi dirûşmeyên silavkirina Berxwedana Serdemê bi dawî bû.

(bx)

ANHA

<iframe width="560" height="315" src="https://www.youtube.com/embed/dqautBDjck0" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>