Şêniyên herêma Efrînê sersaxî da malbata şehîd Gîvara Efrîn

Meclisa Malbatên Şehîdan a herêma Efrînê konê sersaxiya malbata şehîd Bîlal Hemkawî (Gîvara Efrîn) ku 2'yê Çileyê di qonaxa duyemîn a Berxwedana Serdemê de şehîd bûbû û duh li goristana şehîdan a navçeya Ehresê hatibû veşartin, veda.

Di merasîmê de endamê Meclisa Malbatên Şehîdan a kantona Efrînê Reşîd Fatko sersaxî ji malbata şehîd Gîvara re xwest û got: "Di kesayeta şehîd Gîvara de em bejna xwe li hemberî hemû şehîdên azadiyê ditewînin.”

Bi navê Kongeraya Star a kantona Efrînê jî Rohîn Qender axivî û destnîşan kir ku şehîdan ji bo ku axa xwe ji dagirkeriyê rizgar bikin, xwe feda kir û bi saya wan destkeftî hatin bidestxistin.

Endamê rêveberiya Meclisa Navçeya Til Rifetê Mihemed Henan jî wiha axivî: “Komploya ku tê meşandin ne tenê li ser rêber Abdullah Ocalan û gelên demokrat e, lê belê di êrişên dagirkeriya Tirk ên li ser herêmên Heftanîn, Eyn Îsa, Til Rifet û Şêrewa de me dît ku dewleta Tirk a dagirker armanc dike ku vîna gelên berxwedêr têk bibe.”

Piştre endama Meclisa Malbatên Şehîdan Rûken Nesan wesîqeya şehadetê xwend û radestî malbata şehîd Gîvara kir.

(dm)