Malbatên şehîdan bang li PDK`ê kirin ku dest ji siyasetên dijberî Kurdan berde

Di 13`ê Kanûna borî de hêzên taybet ên PDK`ê gule li Hêzên Parastina Gel (HPG) reşandin, di encamê de 3 gerîlayên li herêma Amediyê ya girêdayî Dihokê ya Başûrê Kurdistanê birîndar bûn.

Malbatên şehîdan ên taxên Şêxmeqsûd û Eşrefiyê yên Helebê kiryarên PDK`ê şermezar kirin û banga xurtkirina yekitiyê kir.

‘PDK PIŞTGIRIYA DEWLETA TIRK DIKE’

Bavê şehîd Çekdar, Mihemed Xelî bang li Partiya Demokrat a Kurdistanê (PDK) kir ku dev ji girêdana bi dijminên gelê Kurd re û “îxanetê” berde û diyar kir ku divê PDK bizane ku sûcekî mezin li dijî gelê xwe dike.

Xelîl “şerê îxanetê” red kir û got kiryarên bi vî rengî zirarê didin berjewendiyên gelê Kurd û di demekê de ku ji gelê Kurd tê xwestin ku yekitiya xwe xurt bike, rê li ber rijandina xwîna gelê Kurd vedike.

Birayê şehîd Dewran, Nîdal Elî jî destnîşan kir ku êrişên PDK`ê li dijî gerîlayên HPG`ê ji bo pêkanîna armanc û berjewendiyên dewleta Tirk in û banga yekitiya neteweyî kir.

‘DIVÊ EM LI HEMBERÎ DIJMINÊN XWE BIBIN YEK’

Dayika şehîd Cegerxwîn, Zelûx Mihemed jî êrişên PDK`ê şermezar kirin û got: “Divê em Kurd bi xwe xwîna hev nerijînin û li hemberî dijminên xwe bibin yek.”

Zelûx bang li PDK`ê kir ku siyasetên xwe di ber çavan re derbas bike û bi pey siyasetên dewleta Tirk nekeve.

Dayika şehîd Mihemed, Fîdan Hisên jî bang li PDK`ê kir ku bi pey berjewendiyên dijminên gelê Kurd nekeve, her wiha banga pêkanîna yekitiyê kir.

(cx)

ANHA

<iframe width="560" height="315" src="https://www.youtube.com/embed/ekBIc05vevk" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>