Şêniyên herêmê li pêşiya baregeya Rûsyayê banga rawestandina êrişên dewleta Tirk kir

Şênî li Çerxerêya Şaredariyê ya navçeya Eyn Îsayê kom bûn û ber bi baregeha Rûsyayê ya li navçeyê ve meşiyan.

Şêniyan sloganên li dijî dewleta Tirk a dagirker û silavkirina şehîdan û berxwedana Hêzên Sûriya Demokratîk (QSD) berz kirin, her wiha pankartên “Na ji dagirkeriya Tirk re, erê ji bo parastina destkeftiyan”, “Êdî bes e ji bo dagirkirina Girê Spî”, “Em dixwazin di nava aştiyê de bijîn”, wêneyên şehîdan, alên QSD’ê, Partiya Pêşerojê ya Sûriyê û Tevgera Ciwanên Şoreşger hildan.

Li pêşiya baregeha Rûsyayê, hevserokê Meclisa Kantona Girê Spî Hemîd El-Ebid axivî û diyar kir ku ew ji bo şermezarkirina bêdengiya navneteweyî û garantora Rûsyayê li hemberî êrişên dewleta Tirk a dagirker li dijî Eyn Îsayê, li wir kom bûne.

El-Ebid berxwedana QSD`ê ji bo parastina navçeyê ji êrişên dewleta Tirk silav kir.

Her wiha bi navê êlên Reqayê şêx Mihemed El-Sewan axivî û destnîşan kir ku şênî hemû bi QSD`ê re ne. El-Sewan îşaret pê kir ku sekna wan îro li navçeya Eyn Îsayê nîşaneya hevgirtina gelên herêmê ye û da zanîn ku ew van êrişan red dikin.

Hevserokê Meclisa Rêveber a Herêma Firatê Mihemed Şahîn jî diyar kir ku gelên herêmê ji bo pêkanîna serkeftinê û rizgariya ji zordestiyê bi hezaran şehîd dane.  Şahîn got hebûna dewleta Tirk li ser axa Sûriyê ne rewa ye û gelên Sûriyê çaranûsa xwe bi xwe diyar dikin.

Di dawiya çalakiyê de beşdaran bi berzkirina sloganan, piştrast kir ku gelê Sûriyê yek e, êrişên dewleta Tirk şermezar kirin û berxwedana QSD`ê silav kir.

(şx)

ANHA