Şêniyên Helebê li dijî tecrîda li ser rêber Ocalan meşiyan

Bi pêşengtiya Kongreya Star a Helebê, bi sedan şêniyên taxên Şêxmeqsûdê û Eşrefiyê yên Helebê daketin qadan, tecrîda girankirî ya ku dewleta Tirk li dijî rêber Abdullah Ocalan ferz kiriye şermezar kir.

Meş ji pêşiya hola civînan a beşê rojavayê taxa Şêxmeqsûdê dest pê kir.

Şêniyan wêneyên rêber Abdullah Ocalan, alên Kongreya Star û pankartên bi nivîsên "Sonda me em ê pergala Îmraliyê hilweşînin û bi rêbert Ocalan re azad bijîn" û "Ji tecrîd, faşîzm û dagirkeriyê re êdî bes e, dem dema azadiyê ye" rakirin. Her wiha diruşmeyên banga azadiya Ocalan hatin berzkirin.

Şênî li sêgoşeya Şehîd Serbest a taxa Eşrefiyê sekinîn û veguherî mîtîngê.

Piştî deqeya rêzgirtin a ji bo bîranîna cangoriyên azadî, li perspektîvên rêbertî guhdarî kirin,  ku Rêber Abdullah Ocalan behsa komploya navneteweyî ya li dijî wî hate meşandin û awayê bersivdayîna gelê Kurd ji vê komployê û siyaseta komplogeran re dike.

Di mîtîngê de Hevseroka Meclisa Tevgera Civaka Demokratîk (TEV-DEM) Sûad Hesen axivî û bal kişand ser girîngiya rola rêbertî di çareseriyê aloziyan de kir û wiha pêde çû:"Tekane rêya çareseriya aloziya li Rojhilata Navîn di girtîgeha Îmraliyê de ye, lewma divê hemû jin û gelên li Rojhilata Navîn û her çar parçeyên Kurdistanê dijîn ji bo rêber Abdullah Ocalan serî hildin."

Sûad Hesen diyar kir ku hemû peyman û komployên niha destkeftiyên gelê Bakur û Rojhilatê Sûriyê û porjeya Neteweya Demokratîk dikin armanc.

Di dawiyê de Sûad Hesen ev yek anî ziman:"Gelê Kurd pêşeroja xwe ya demokratîk û azad li ser bingeha felsefeya rêber Abdullah Ocalan ava dike û vîna me li hemberî van siyasetên hovane naşkê."

(eh)

ANHA