Şêx û serokeşîrên Eyn Îsayê: Em li pişta QSD`ê ne

Şêx û serokeşîrên kantona Girê Spî û navçeya Eyn Îsayê bi fermandarên Meclisa Leşkerî ya Girê Spî re ku navenda wê li Eyn Îsa ye, civiyan.

Fermandarên leşkerî bal kişand ser pêşketinên dawîn ên li navçeyê û di serî de êrişên domdar ên dewleta Tirk a dagirker, peymana ku duh hatiye ragihandin a girêdayî avakirina 3 nuqteyên çavdêriyê yên hevbeş ên QSD û hikumeta Şamê bi çavdêriya Rûsyayê.

Meclisa Leşkerî ya Girê Spî ragihand ku dê 3 nuqteyên çavdêriyê yên hevbeş bi hikumeta Şamê re û bi çavdêriya Rûsyayê li navçeya Eyn Îsayê li kêleka rêya M4 ava bikin, da ku çavdêriya agirbesta li herêmê û destdirêjiya dewleta Tirk li ser navçeyê bikin.

Fermandarên leşkerî bersiva hemû pirsên şêx û serokeşîrên herêmê li ser girîngiya nuqteyên çavdêriyê ku vê dawiyê de hatine ragihandin û îdiayên li ser çarenûsa navçeya Eyn Îsayê ku di hin dezgehên çapemeniyê de hatine belavkirin, dan.

Fermandaran diyar kir ku Hêzên Sûriya Demokratîk ji bo parastina xaka Sûriyê ji êriş û destdirêjiyan, her tim amade ne.

Fermandarên Meclisa Leşkerî ya Girê Spî îdiayên ku hin dezgehên çapemeniyê belav kirine ku dibêjin Rûsya û hikumeta Şamê dixwazin çargoşeyeke ewlehiyê li navçeyê ava bikin, derewandin û tekez kir ku hemû civîn û hevdîtinên wan di çarçoveya koordîne û xebatên leşkerî de bûn.

Şêx û serokeşîrên herêmê jî tekez kir ku şervanên QSD`ê hemû êrişên dewleta Tirk a dagirker ên li dijî navçeyê têk birin û gotin ew ê li hemberî çavnebariyên dagirkeran li kêleka QSD`ê bin.

Serokeşîran her wiha diyar kir ku ew bi QSD`ê bawer in û heke gef û destdirêjiyên dewleta Tirk a dagirker li dijî herêmên wan berdewam bikin, ew ê bi zanabûn tev bigerin.

(cx)

ANHA

<iframe width="560" height="315" src="https://www.youtube.com/embed/oLmRmjhPWJY" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>