Meclisa Jinan a Bakur û Rojhilatê Sûriyê: Sîstemên zordest mafên mirovan binpê dikin

Bi boneya Roja Mafên Mirovan a Cîhanê, Meclisa Jinan a Bakur û Rojhilatê Sûriyê daxuyaniyeke nivîskî da. Di daxuyaniyê de wiha hate gotin:

“Her sal di 10`ê Kanûnê de welatên cîhanê Roja Mafên Mirovan a Cîhanê pîroz dikin. Ev roj di sala 1948`an de ji aliyê Lijneya Giştî ya NY`yê ve hate pejirandin û bi erêkirina hemû endaman di 1950`î de bi awayekî fermî hate ragihandin.

Ew yek destkeftiyeke mezin a NY`yê bû, ji ber ku mafên siyasî, sivîl, aborî, civakî û çandî yên hemû mirovan hatin mîsogerkirin. Tevî ku piraniya welatên cîhanê tev li wê yekê bûn jî, lê belê hîna mafên mirovan tên binpêkirin û bendên wê danezanê ji aliyê sîstemên zordest ve tên binpêkirin.

Bûyerên li Sûriyê ji beriya 10 salan ve rû didin, piştrast dikin ku tespîtkirina mafan di peyman û biryaran de têrê nake, lê belê divê ji binpêkirinê bên parastin.

Li Bakur û Rojhilatê Sûriyê ji aliyê dagirkeriya Tirk û komên terorîst ên girêdayî wê ve bi taybetî li bajarên dagirkirî, mafên mirovan hatin binpêkirin û sûcên wekî kuştin, revandin, talankirin, koçberkirin û qutkirina avê ji ser nîv milyon mirovî, pêk hatin. Civaka navneteweyî ku ew maf rewa kirine, li hemberî wê rewşê bê deng ma, ne hesab xwest û ne sûcdar darizandin.

Wek Meclisa Jinan a Bakur û Rojhilatê Sûriyê em bang li rêxistinên jinan û rêxistinên mafên mirovan dikin ku li hemberî hêzên zordar ku mafên mirovan binpê dikin, hevgirtî û yekdest bin, her wiha sûcdar û kesên ku van mafan li cîhanê û Sûriyê bi giştî û li Bakur û Rojhilatê Sûriyê bi taybet, binpê dikin, radestî dadgehên navneteweyî bikin û wan darizînin.”

(cx)

ANHA