Dayikên şehîdan êrişên dewleta Tirk ên li dijî Başûr şermezar kirin

Dayikên gerîla û şehîdan ên bajarê Hesekê daxuyaniyek da û hewldanên derxistina şerê birakujiyê şermezar kirin.

Daxuyanî li Baxçeyê Kawa yê taxa Miftî bi beşdarbûna bi dehan ji dayik û malbatên şehîdan ji aliyê Îva Ebdulkerîm Mihemed ve hate xwendin.

Îva Ebdulkerîm Mihemed di destpêka xwendina daxuyaniyê de got: "Tevgera azadiyê ya Kurdistanê ji destpêka damezirandina xwe ve ji bo azadî û parastina gel ji zor û koletiyê tê dikoşe."

Îva êrişên dewleta Tirk ên dagirker li dijî herêmên Başûrê Kurdistanê û Herêmên Parastinê yên Medyayê şermezar kirin.

Îva da zanîn ku tevgera azadiyê ya Kurdistanê dikare dagirkeriya dewleta Tirk li Herêmên Parastinê yên Medyayê bi berxwedan û lehengiya xwe têk bibe.

Îva piştrast kir ku tevgera azadiyê ya Kurdistanê li ser fikr û felsefeya rêber Abdullah Ocalan ava bû û bi van fikran dê planên dewleta Tirk têk bibe.

Di dawiya daxuyaniyê de dirûşmên silavkirina berxwedana gerîla hatin berzkirin.

AMÛDÊ

Dayikên şehîd û gerîlayan li navçeya Amûdê daxuyaniyek da û êrişên dewleta Tirk ên li dijî Herêmên Parastinê yên Medyayê şermezar kirin.
Bi dehan dayikên şehîd û gerîlayan li pêşiya navenda Kongreya Star a navçeyê kom bûn.
Endama Kongreya Star Hena Xalid daxuyanî xwend û piştrast kir ku dewleta Tirk a dagirker êrişên li dijî herêmên Heftenîn, Garê û Metîna didomîne û destnîşan kir ku Partiya Demokrat a Kurdistanê (PDK) bi dagirkeriya Tirk re hevkar e.
Hena piştrast kir ku komployên li dijî gelê Kurd tên kirin, wê bi saya fikr û felsefeya rêber Abdullah Ocalan û berxwedana şervanên azadiyê werin têkbirin.
Hena bi domdarî got: "Em ê wek dayik û xwişkên gerîla, asta têkoşîna xwe bilind bikin û rêya ku rêber Abdullah Ocalan ji me re xêz kiriye, bişopînin. Em rê nadin dagirkeran ku daxwazên xwe pêk bînin."

(dm)

ANHA