'Lidarxistina mîhrîcanê di vê demê de bi xwe serkeftinek e'

Rêveberên Desteya Çand û Hunerê ya Rêveberiya Xweser a Bakur û Rojhilatê Sûriyê diyar kirin ku lidarxistina Mihrîcana Lêlûnê a Sînemayê ya Navneteweyî li gel mercên zehmet ku şêniyên kantona Efrînê dikişînin bi serê xwe berxwedanek e.

21 îlon, 2020 15:55

ŞEHBA – CAFER CAFO

Şandeyek ji rêveberên Desteya Çand û Hunerê ya Rêveberiya Xweser a Bakur û Rojhilatê Sûriyê ji bo şopandina Mihrîcana Lêlûnê a Sînemayê ya Navneteweyî gihîşt Şehbayê.

Têkildarî girîngiya vê mîhrîcanê li herêma Efrînê, hejmarek rêveberên Desteya Çand û Hunerê ji ANHA'yê re axivîn û diyar kirin ku lidarxistina mîhrîcanê di rewşeke zehmet de ku şêniyên Efrînê tê re derbas dibin bi tenê serê xwe berxwedanek û girêdana şêniyên Efrînê ya bi çanda xwe ve nîşan dide.

Hevseroka Desteya Çand û Hunerê ya Rêveberiya Xweser a Bakur û Rojhilatê Sûriyê Eyşe Receb got: "Kantona Şehba warê berxwedan û têkoşînê ye, berxwedana 58 rojan ya şêniyên Efrînê ya li hemberî artêşa Tirk a dagirker û çeteyên wê heta vê kêliyê li kantona Şehbayê berdewam dike."

Eyes Recep têkildarî hatina wan a ji bo Şehbayê diyar kir ku ew ji bo piştgiriya berxwendana şêniyên Efrînê hatine û wiha domand: "Desteya Çand û Hunerê ya Herêma Efrînê tevî mercên zehmet ên koçberiyê kedeke mezin ji bo lidarxistina mîhrîcanê daye. Ev girêdana şêniyên Efrînê bi çand û xaka wan ve ji cîhanê re îsbat dike û dide diyarkirin ku berxwedana wan bi dawî nebûyê, wê heta rizgarkirina Efrînê ji dagirkeran berdewam bike."

Eyşe diyar kir ku artêşa Tirk a dagirker û çeteyên wê hewl didin bi hemû rêbazan çanda şêniyên BAkur û Rojhilatê Sûriyê îmha bikin û got: " Em ê ji tevahî cîhanê re çanda şêniyên Bakur û Rojhilatê Sûriyê xuya bikin, em ê hizra mîhrîcana Lêlûn a Sînameya Navneteweyî berdewam bikin.”

Cîgira hevserokatiya Desteya Çand û Hunerê ya Herêma Firatê Dijwar got: "Şêniyên Efrînê ji cîhanê re îsbat kirin ku mayîna wan a li kantona Şehbayê mîsogeriya vegera wan a li warê wan û rizgarkirina xaka xwe ji hêzên dagirker ye. Tevî mercên koçberiyê û azarên di kampan de lîdarxistina mîhrîcana navneteweyî cihê teqdîr, rêzgirtin û şehnaziyê ye."

Her wiha destnîşan kir ku mîhrîcana Lêlûn û beriya wê ya Mîtan bala cîhanê kişand û girêdana şêniyên Efrîn û çanda wê bi xaka xwe ve îsbat dike.

ANHA

'Lidarxistina mîhrîcanê di vê demê de bi xwe serkeftinek e'

Şandeyek ji rêveberên Desteya Çand û Hunerê ya Rêveberiya Xweser a Bakur û Rojhilatê Sûriyê ji bo şopandina Mihrîcana Lêlûnê a Sînemayê ya Navneteweyî gihîşt Şehbayê.