Şêniyên Hesekê di merasîma oxirkirina şehîd Umran de soza şopandina rêya şehîdan da

Şêniyan cenazeyê şehîd Umran El-Hamid ji ber avahiya Meclisa Malbatên Şehîdan a bajarê Hesekê girtin û bi karwanekî wesayîtan ber bi Goristana Şehîd Dijwar ve ketin rê.

Li goristanê merasîm bi deqeyeke rêzgirtin li gel toreneke leşkerî ji hêla YPG û Hêzên Erka Xweparastinê dest pê kir. Paşê Hevserokê Meclisa Malbatên Şehîdan a bajarê Hesekê Bedrî Hewale axivî û sersaxî ji malbata şehîd re xwest û got: “Em ji mirinê natirsin, lê em ditirsin ku gelê me di bin zilma dijmin de bijî. Ji bo azadî û rûmetê em şer dikin.”

Hewale soza berdewamkirina têkoşînê heta pêkanîna armancên şehîdan da.

Her wiha Berpirsê Têkiliyan ê Hêzên Erka Xweparastinê ya Bakur û Rojhilatê Sûriyê Salim Îbrahîm got: “Hêzên me dê gelê xwe biparêzin. Vîn û israra wan roj bi roj zêde dibe. Em ê heta rizgarkirina tevahiya herêmên dagirkirî ji dewleta Tirk û çeteyên wê têbikoşin. Em soza şopandina rêya şehîdan heta pêkanîna serkeftinê didin.”

Piştre endama Meclisa Malbatên Şehîdan Rojda Ehmed wesîqeya şehadetê xwend û radestî malbata şehîd kir.

Di merasîmê de nasnameya şehîd Dêrsim Ehmê (Qendîl) ê ku li çiyayên Kurdistanê şehîd bûye hate eşkerekirin.

Di dawiya merasîmê de girseya gel cenazeyê şehîd di nav tilîliyên dayîkan de veşart.

(şx)

ANHA