‘Azadiya rêber Abdullah Ocalan azadiya gelên Rojhilata Navîn e’

Hêzên Parastina Civakî (HPC) îro meşek li navçeya Tirbespiyê ya herêma Cizîrê organîze kir. Pêkhateyên navçeyê ji Kurd, Ereb, Suryan û êzidî bi girseyî tev li meşê bûn û tecrîda giran a ku li dijî rêber Abdullah Ocalan ji 2015`an ve hatiye ferzkirin û êrişên dewleta Tirk ên li dijî herêma Heftanînê ya Başûrê Kurdistanê şermezar kirin.

Meş ji ber navenda Kongreya Star a li navçeyê dest pê kir û li navenda Tevgera Ciwanên Şoreşger ên Sûriyê bi dawî bû. Şêniyan sloganên “Bê Serok jiyan nabe” û “Azadiya rêber Abdullah Ocalan azadiya gelên Rojhilata Navîn e” berz kirin û wêneyên rêber Abdullah Ocalan hildan.

Her wiha êrişên dewleta Tirk a dagirker li dijî herêmên Kurdistanê bi taybet herêma Heftanîn li Başûrê Kurdistanê şermezar kirin û bang li civaka navneteweyî kirin ku rê li pêşiya dewleta Tirk bigirin û piştrast kirin ku Erdogan terorê li djiî gelê Kurd dimeşîne.

Meş li ber dibistana Xewla a keçan rawestî û veguherî mitîngê. Di mitîngê de ji fermandarên Hêzên Parastina Civakî Nasir Yunis axivî û got: “Dewleta Tirk seriyê terora cîhanî ye. Siyaseta gefxwarin û kuştinê li dijî gelê herêmê bi giştî û gelê Kurd bi taybet dimeşîne.”

Yunis diyar kir ku dewleta Tirk mafên gelê Kurd înkar dike û bi rêya ferzkirina tecrîda giran li dijî rêber Abdullah Ocalan siyaseta qirkirinê li dijî wî pêk tîne û wiha domand: “Armanc jî dûrxistina gel ji rêber Ocalan e.”

Yunis piştrast kir ku gelên Rojhiata Navîn bi rêya fikrên rêber Abdullah Ocalan azadî û xilasî nas kirin û got: “Azadiya me bi azadiya serok Abdullah Ocana ve girêdayî ye.”

Yunis di dawiya axaftina xwe de bang li rêxistinên hiqûqî yên cîhanê kir ku rola xwe pêk bînin û zextê li dewleta Tirk bikin da ku tecrîdê bi dawî bikin.

(şx)

ANHA

<iframe width="560" height="315" src="https://www.youtube.com/embed/GwTa5tZ9s_w" frameborder="0" allow="accelerometer; autoplay; encrypted-media; gyroscope; picture-in-picture" allowfullscreen></iframe>