Panel bo destpêka çareserkirina doza Sûriyê gavek e

Duh Meclisa Sûriya Demokratîk MSD`ê bi dirûşmeya "Ber bi kongreyeke netewî ya şêniyên Cizîrê û Firatê ve" , li bajarê Hesekê ji bo lidarxistina kongreyeke netewî ya giştî li Bakur û Rojhilatê Sûriyê panelek li dar xist.

Zêdetirî 500 kesayetên siyasî, eşîrtî, civakî  û serbixwe yên Kurd, Ereb, Aşûr, Suryen, Çerkes û Êzidî yên bajarê Hesekê û gundewarên wê, beşdarî panelê bûn.

Panel li ser 3 beşan bû û ev xal tê de hatin nîqaşkirin; têkiliyên dîrokî yên gelê herêmê û rola wê di avakirina pêşeroja gelê Sûriyê de, rola pêkhateyên Sûriyê di xurtkirina van têkiliyan de, diyaloga Sûrî-Sûrî, Rêveberiya Xweser û pîvanên xebatê saziyan û mekanîzmeya pêşxistina beşdarbûna di Rêveberiya Xweser de.

Şêxekî qebîleya Şerabîn Mihemed Ubêd tekezî bi rola van panelan di nêzkirina gelê Sûriyê de û nîqaşkirina wan û astengiyên heyî de, kir û got: "Em spasiya MSD`ê dikin ji ber lidarxistina panelên bi vî rengî û hêvî dikin ku panelên baştir di demên pêş de bên lidarxistin."

Bi armanca beşdarbûneke zêdetir di Rêveberiya Xweser de û ji nû ve sazkirina rêveberiyê li gorî pêşketinên li Sûriyê bi giştî û bakurê Sûriyê bi taybetî, dê panelên bi vî rengî li seranserê herêmên Bakur û Rojhilatê Sûriyê bên lidarxistin.

Di vê çarçoveyê de, şêxê qebîleya Şerabîn Mihemed Ubdê bang li pêkhateyên Sûriyê ên di nava refên artêşa Tirk a dagirker de kir ku vegerin welatê xwe û ji Erdogan ku vegerandina împeratoriya Osmanî armanc dike, qut bibin.

Endamê Yekitiya Rewşenbîran a herêma Cizîrê Ezher Ehmed diyar kir lidarxistina panel û diyalogan di vê demê de bi taybetî û di vê qonaxa nazik de, pir girîng e. Nexasim piştî ku bi lihevkirina hemû dewletan ji qonaxa leşkerî derbasî qonaxa siyasî bûn. Ehmed wiha domand: "Pêwîstiya me bi çareseriya Sûrî-Sûrî heye."

Ehmed her wiha destnîşan kir ku di her 3 beşên panelê de, diyalog û pêşinyarên baş ên çareserkirina aloziya Sûriyê û avakirina bingeheke Sûriyê ku hemû gelê Sûriyê digire nava xwe, derketin pêş.

Ehmed bi bîr xist ku lidarxistina panel û diyalogan li herêman dê nêrîneke hevbeş a hemû gelê Sûriyê ya ji bo çareserkirina aloziyê bi xwe re bîne û got: "Dê encam erênî bin, ji ber ku pêwîstiya me bi çareseriyên siyasî heye."

Endamê Meclisa Êlan a Hesekê Sabit El-Cewher jî panel nirxand û got: "Panela yekemîn gelek serkeftî bû, ji ber ku hemû beşên civakê wekî eşîrên Kurd û Ereb û pêkhateyên din, partiyên siyasî yên muxalîf û nûnerên hikumeta Sûriyê, tê de beşdar bûbûn."

El-Cewher wiha da zanîn: "Nêrînên beşdaran ev panel dewlemendtir kir û gelek encamên baş ên pêşxistina aliyê rêveberiyê yê saziyên Rêveberiya Xweser û pêşxistina diyalogeke Sûrî ya giştî li ser astê Bakur û Rojhilatê Sûriyê û li ser astê Sûriyê bi giştî, bi xwe re anî."

El-Cewher daxuyand ku di panelê de nêrînên siyasî yên muxalefetê, hikumeta Sûriyê û nûnerên Rêveberiya Xweser girêdayî astengiyên li pêş saziyên rêveberiyê û sîwana wê ya siyasî (MSD) û destkeftiyên siyasî ku MSD`ê di demên dawîn de bi dest xistiye, derketin. Ji lewra ev panel pir girîng bû.

El-Cewher wiha berdewam kir: "Tevlîbûna diyalog û nîqaşan ne wekî panelên berê bû. Ji ber ku diyalog vekirî bû û ji ber hebûna nûnerên dijberên projeya Rêveberiya Xweser û nûnerên hikumeta Sûriyê, partiyên siyasî û eşîran, nêrînên nû hatin pêşkêşkirin. "

Sabit El-Cewher wiha axaftina xwe bi dawî kir: "Dê hemû panel bi lidarxistina kongreyeke giştî yên şêniyên herêmên Cizîrê û Firatê bi dawî bibin. Armanc jê aktîvkirina diyalogê ji bo destpêkirineke nû ya çareserkirina aloziya Sûriyê ye."

(cx)

ANHA

<iframe width="560" height="315" src="https://www.youtube.com/embed/Cfbu5r7h1hA" frameborder="0" allow="accelerometer; autoplay; encrypted-media; gyroscope; picture-in-picture" allowfullscreen></iframe>