Kongreya Star ji bo şermezarkirina sûcên dewleta Tirk meşek li dar xist

Artêşa Tirk a dagirker êrişên li ser herêmên Başûrê Kurdistanê gur kirin, her wiha di encamê de bi dehan sivîlan jiyana xwe ji dest da. Lê li gel wê jî hikumetên herêma Kurdistan û Iraqê bê deng in û tu helwesteke cidî nîşan neda. Ji aliyekî din ve jî tecrîda girankirî li dijî rêber Abdullah Ocalan bi zêdekirina êrişên dewleta Tirk a dagirker, girantir bû.

Ji bo şermezarkirina van siyasetan, bi sedan şêniyên Qamişloyê, endamên saziyan û rûspiyên eşîran xwepêşandek li dar xist û tê de banga bidawîkirina dagirkeriya Tirk kir.

Şênî li Çerxerêya Rojhilat a bajêr kom bûn, wêneyên rêber Abdullah Ocalan, pankartên "Em xwediyê vê axê ne", "Erdogan dagirker e û divê bê darizandin", "Bi berxwedana Zîlan û Avestayan em ê dagirkeriyê têk bibin" û "Na ji bêdengiya navneteweyî re li hember sûcên dewleta Tirk a faşîst li dijî qirkirina gelê Kurd" hildan.

Meş ji Çerxerêya Rojhilat ve dest pê kir û li kolanên sereke geriya û di dawiyê de mîtîngek li dar ket.

Piştî deqeyeke rêzgirtinê, endama rêveber a Kongreya Star Remziye Mihemed axivî û êrişên dewleta Tirk a dagirker ên bi çekên giran li dijî Heftanînê şermezar kirin, her wiha piştrast kir ku dê xeta têkoşîn û berxwedanê heta pêkanîna serkeftin bidomînin.

Remziye Mihemed diyar kir ku dewleta Tirk a dagirker bi hemû rêbazan hewl dide gelê Kurd ji hev bike û bal kişand ser ku di metoda neteweya demokratîk û pêkanîna siyaset û fikra rêber Abdullah Ocalan de berdewam in.

 (fr)

ANHA