Çeteyên Suleyman Şah ji bo çûna Lîbyayê komeke nû li Efrînê ava dikin

Çeteyê bi navê Ebid El-Mûîn Ebû Xalid hewl dide tûgayeke nû bi navê ‘Tûgaya Başûr’ ava bike. Ev tûgay ji çeteyên koma Sultan Suleyman Şah tê avakirin da ku bişînin Lîbyayê.

1 îlon, 2020 12:27

ŞEHBA

Rêxistina Mafên Mirovan a Efrîn – Sûriyê daxuyaniyek li ser rûpela xwe ya fermî ya medyaya civakî belav kir û tê de destnîşan kir ku çeteyên dewleta Tirk a dagirker ji bo çûna Lîbyayê tûgayeke nû ava dikin.

Li gorî daxuyaniyê, hejmara kesên ku tev li vê tûgayê bûne, gihaştiye 150 çeteyî û ew hemû jî ji bejahiya Derayê ne. Her wiha dê çete ji bo parastina nuqteyên leşkerî yên dewleta Tirk biçin Lîbyayê û mehane hezar û 500 dolar wergirin.

Her wiha hate diyarkirin ku çeteyên dewleta Tirk a dagirker ciwanê bi navê Cîhad ê ji gundê Derwîş ê girêdayî navçeya Raco ku di 11'ê meha borî de revandibû, berdaye. Cîhad ji bo ku were berdan 700 lîreya Tirk daye çeteyan.

Rêxistinê girêdayî heman mijarê diyar kir ku 4 şêniyên gundê Mistikê yê girêdayî navçeya Şiyê, piştî ku ji her yekî hezar û 200 – 2 hezar lîreyên Tirkiyê standin, serbest berdan. Li gorî rêxistinê navên kesên ku hatine berdan wiha ne; Mihemed Hiso, Ebdo Mihemed, Malşîn Elo û Esed Elo.

ANHA