Werşeya Dêrikê careke din dest bi dirûtina maskan kir

Li herêmên Bakur û Rojhilatê Sûriyê Koronavîrus (Covid-19) zêde belav dibe û der barê vê yekê de Rêveberiya Xweser gelek tedbîr girtin, di heman demê de saziyên xizmetguzariyê tevahiya derfetên xwe xistin xizmetê, herêmê dezenfekte dikin û maskan didirûn.

Li herêmên Rêveberiya Xweser qedexeya derketina derve hatiye ferzkirin, ji ber vê werşeyên Dêrikê yên girêdayî Nivîsgeha Jinan a Şaredariya Gel careke din tevahiya projeyên xwe yên dirûtinê sekinandin û dest bi dirûtina maskan kir.

Li werşeyê 4 karker dixebitin û rojane 3 hezar maskan didirûn, paşê radestî Heyva Sor a Kurd dikin û ew jî taqîm dikin û li xebatkarên saziyan, Hêzên Ewlekariya Hundirîn û saziyên xizmetguzariyê belav dikin.

Endama rêveber a Nivîsgeha Jinan a Şaredariya Gel a Dêrikê û çavdêra werşeya dirûtinê Eyşa Izedîn axivî û got vîrus li herêmê belav bûye û ji bo pêwîstiyên herêmê ji maskan dabîn bikin, ev cara duyemîn e ku ew karê xwe disekinînin û dest bi dirûtina maskan dikin.

Eyşa Izedîn destnîşan kir ku destpêkê maskan li endamên saziyan û daîreyan belav dikin, ji ber ku di vê qonaxa zehmet de ew bi şev û roj kar dikin.

Li aliyekî din jî şênî biryara Rêveberiya Xweser a dema ji malên xwe derkevin maskan li xwe bikin, bi cih tînin.

(eh)

ANHA