Komeleya Xwedîkirina Zarokên Bêkes li zarokan xwedî derdikeve

Komeleya Xwedîkirina Zarokên Bêkes bi hevkariya Meclisa Giştî ya Şêxmeqsûd û Eşrefiyê û Heyva Sor a Kurd, di 6’ê Gulanê de Mala Piştgiriya Sêwiyan li aliyê rojhilatê taxa Şêxmeqsûd a bajarê Helebê vekir.

Mala Piştgiriya Sêwiyan zarokan  perwerde dike û mafên wan diparêze û behreyên wan bi pêş dixe. Li malê 4 zarok hene, yê herî biçûk 6 salî ye û yê mezin jî deh salî ye. Zarokên li malê bi pergaleke diyarkirî  roja xwe derbas dikin.

Mal ji du qatan pêk tê û du ode ji bo xewê ne û li gel vê yekê deh text tê de hene. Odeyek ji bo rahênan û çalakiyên perwerdeyê ye û hewşek jî ji bo zarok lê bilîzin.

Zarok her sibeh saet di 8:00`an de ji xew radibin, nîv saetekê sporê dikin, di demên diyar de xwarina xwe dixwin û paşê dest bi waneyên xwe dikin.

Komeleyê ji bo fêrkirina zarokan 3 mamoste diyar kirine; yek ji bo fêrkirina zimanê kurdî, yek ji bo fêrkirina zimanê erebî û yek jî ji bo waneyên xêzkarî û muzîkê.

Li mala sêwiyan dadikek heye û li xwedîkirina zarokan baldar e, li gel vê yekê her du rojan carekê zarok serê xwe dişon û cilên paqij li ber xwe dikin. Komele hefteyê du caran zarokan derdixe baxçeyan, li baxçeyan dilîzin û bi xelkê re didin û distînin.

Tê payîn ku ku hewşa malê ji bo lîstika zarokan were veqetandin û pêlîstokan lê deynin û derfetê bidin zarokan ku li dibistanan bixwînin.

Di vê çarçoveyê de endamê Komeleya Xwedîkirina Zarokên Bêkes Mistefa Sîdo got li taxê hewcedarî bi devereke ewle hebû û armanca wan ne tenê komkirina zarokan bû lê belê ji wê wirdetir armanca wan ew e ku behre û asta bîrdoziya zarokan  bi pêş bixin.

Mistefa Sîdo destnîşan kir ku ew ê bi hemû derfetên xwe pêwîstiyên zarokan peyda bikin û bang li rêxistinên xêrxwaz kir ku destê alîkariyê dirêjî malê bikin.

Şêniyên taxên Şêxmeqsûd û Eşrefiyê hem madî û hem manewî alîkariya komeleyê dikin û diyariyan didin zarokan.

(eh)