Hêzên navneteweyî teqîna li Efrînê şermezar kir lê îşaret bi sûcên hêzên dagirker nekir

Duh li bajarê Efrînê yê dagirkirî teqînekê rû da, di vê derbarê de Navenda Çavdêriya Mafên Mirovan a Sûriyê (SOHR) diyar kir ku di encama teqînê de zêdetirî 46 kes bûn qurbanî û zêdetirî 50 kesên din jî birîndar bûn.

Wezareta Karên Derve ya DYA’yê bi daxuyaniyekê teqîn şermezar kir û daxuyand ku DYA vê kiryara terorîstî ku li Efrînê pêk hatiye û di encamê de bi dehan kesên li nava bazara navendî bûn qurbanî, şermezar dike.

Wezaretê piştrast kir ku detayên destpêkê diyar kir ku piraniya kesên bûne qurbanî, sivîl bûn û di nava wan de zarok jî hebûn. Daxuyaniyê wiha diyar kir: "Ev kiryarên hovane nayên pejirandin, li gel vê yekê dubare DYA`yê ji bo xaka Sûriyê banga agirbestê dike û DYA tev li banga nûnerê taybet ê NY`yê Geir Otto Pedersen dibe.”

Di heman çarçoveyê de wezîrê kar û barên Rojhilata Navîn û Bakurê Afrîkayê yê Brîtanyayê James Cleverly daxuyaniyek da û teqîn wek "kiryareke terorîstane" bi nav kir. Cleverly bi twittekê ragihand ku ew hemberî raporan bi tirs bû, ji ber amaje bi qetilkirina bi dehan sivîlan dikir.

18’ê Adara 2018`an artêşa Tirk û çeteyên wê derbasî bajarê Efrînê bûn, li herêmê domdar ji ber kiryarên diziyê û parkirina malên şêniyên Efrînê çete di nava nakokiyan de ne, her wiha şêniyên Efrînê qetil dikin û demografiya herêmê diguherînin. Lê daxuyaniya Wezareta Karên Derve ya DYA’yê û wezîrê Brîtanyayê qet behsa kiryarên hovane yên ku rojane li herêmê diqewinin, nekir.

(eh)