Werşeya dirûtinê ya Dêrikê rojane 500 maskan çêdike

Koronavîrusa nû (Covid-19) li seranserê cîhanê berbelav bûye. Werşeya dirûtinê ya Dêrikê rojane 500 maskan didirû û hewcedariya herêmê dabîn dike.

6 nîsan, 2020 11:28

QAMIŞLO

Mask ji bo xweparastina ji Koronavîrusê tedbîreke baş in û ji ber vê yekê Werşeya Dêrikê ya Nivîsgeha Jinan a Şaredariya Gel a Dêrikê hewl dide pêwîstiyên gel ji maskan dabîn bike. Werşe (atolye) rojane 6 saetan dixebite û 500 maskan çêdike.

Karkerên li werşeyê dixebitin lepikan û maskan li xwe dikin û beriya ku li werşeyê dest bi karê xwe bikin, werşe tê dezenfektekirin.

Endama Rêveber a Nivîsgeha Jinan a Şaredariya Gel û çavdêra werşeyê Eyşe Îzedîn axivî û got: "Armanca me ji vê projeyê dabînkirina maskan e, destpêkê em li endamên saziyan, daîreyên di vê pêvajoyê de bi şev û bi roj dixebitin, belav bikin. Ev însiyatîf bi armanca piştgiriya Rêveberiya Xweser di peydakirina maskan de pêk tê."

Eyşe Îzedîn diyar kir ku piştî mask bi dawî bibin ew ê radestî Heyva Sor a Kurd bikin da ku maskan dezenfekte bikin û belav bikin.

Komîteya Şaredariyan û Heyva Sor a Kurd bi armanca dabînkirina hejmareke baş ji maskan û li komîteyên xizmetê dikin, her wiha li endamên Hêzên Ewlekariya Hundirîn belav bikin, gelek xebat dane destpêkirin.

(eh)

ANHA