550 mamosteyên zimanê kurdî bawernameyên derçûnê wergirtin

Komîteya Fêrkirin û Perwerdê ya kantona Hesekê şahiyek li yarîgeha Dirbêsiyê organîze kir  û bawernameyên zimanê kurdî li ser 550 mamosteyên ku peymangeha Şehîd Roza Cûdî di salên 2015, 2016 û 2017’an de bi dawî kirine, belav kirin.

Di merasîmê de bi sedan mamosteyên zimanê kurdî ya navçeya Dirbêsiyê, saziyên li bajarê û gundewarên wê beşdar bûn.

Merasîm bi deqeyeke rêzgirtinê dest pê kir. Piştre bi navê Komîteya Rêveberiya Dibistanan a kantona Hesekê Raman Hesaf diyar kir ku ziman nasnameya gel û hebûna wan e, lewre girêdana bi zimanê dayikê erkek e ku divê hemû ferd xwe tê de bisepîne.

Hesaf mamoste spas kir û wiha got: "Em spasiya tevahî mamosteyên ziman ên ku ked di danîna kevirê bingeh ji bo vejandina zimanê kurdî, parastina wê de dane û nifşên ku perwerde bi ziman û çanda xwe dibînin, dikin."

Ji aliyê xwe ve jî Hevserokê Buroya PYD’ê ya Dirbêsiyê Suleyman Xelîl diyar kir ku dewleta Tirk di binpêkirin û siyaseta qirkirina gelê Kurd, çand û zimanê wê de berdewam e û wiha domand: "Me êrişên dewleta Tirk ên li dijî herêmên Bakur û Rojhilatê Sûriyê ku yekser dibistan û peymangeh hedef girtine da ku xwendekar xwendina xwe berdewam nekin, dîtin."

Xelîl anî ziman ku tevî hewldana dewleta Tirk a qirkirina gelê Kurd, lê nahêlin ew zarokên ji fêrbûna zimanê dayik û çanda xwe bê par bimînin.

Piştre navên mamosteyên perwerde bi dawî kirine ya bi hejmara 550 mamoste hat xwendin û bawername radestî wan hate kirin.

 (fr)

ANHA