Meclisa Til Temirê civîneke gel li dar xist

Têkildarî rewşa ku herêma Bakur û Rojhilatê Sûriyê tê re derbas dibe, lihevhatinên di navbera QSD û Rûsyayê de û yekitiya kurdî, Meclisa Til Temirê civîneke berfireh li dar xist. Civîn li Meclisa Malbatên Şehîdan li dar ket û bi sedan şêniyên navçeyê û gundewarên wê, her wiha endamê Meclisa Giştî ya PYD`ê Ebdulkerîm Saroxan tev lê bûn. 

Ebdulkerîm Saroxan diyar kir ku Bakur û Rojhilatê Sûriyê derbasî qonaxeke nû dibe û got: "Şerê ku ev 8 sal e li Sûriyê diqewime û bi taybet jî li Bakur û Rojhilatê Sûriyê, derbasî qonaxeke nû dibe. Hêzên hegemonîk xwest serweriya xwe li ser herêmê bidin çêkirin lê bi saya berxwedana gel û şervanan rê li ber polîtîkayên wan hate girtin. Gelê Bakur û Rojhilatê Sûriyê dikaribûn di hundirê projeya neteweya demokratîk de hêz, hebûn û nasnameya xwe biparêzin."

Saroxan wiha pê de çû: "Hêzên ku di Şerê Cîhanê yê Yekemîn û Duyemîn de gelê resen ku ji ser xaka wan koç kirin û beşek ji wan qir kirin, heman hêzan xwest di şerê sêyemîn de jî polîtîkayên xwe pêk bînin lê berxwedana gel û şervanan bû mertal ku nikaribin dîrok û çanda herêmê bidin helandin û windakirin."

Saroxan got Sûriye bû navenda nakokiyên navdewletî û wiha dawî li axaftina xwe anî: "Sûriye bûye navenda Şerê Cîhanê yê Sêyemîn, di heman demê de bûye navenda nakokiyên di navbera hêzên hegemonîk de û her hêzek ji wan dixwaze ku para xwe ji Sûriyê bigire."

Her wiha li ser geşedanên dawîn, êrişên dewleta Tirk a dagirker û çeteyên wê pirsên gel hatin bersivandin.

ANHA

<iframe width="560" height="315" src="https://www.youtube.com/embed/mDDj8KmIG4A" frameborder="0" allow="accelerometer; autoplay; encrypted-media; gyroscope; picture-in-picture" allowfullscreen></iframe>