"Dewleta Tirk İdlib'ê ji bo pêkanîna ajandeyên xwe bi kar tîne"

Partiya Sûriyê ya Pêşerojê foruma diyalogê bi sernavê "Koçberî û Koçberiya Bizorê" li buroya xwe ya li navçeya Şedadê bi beşdariya bi dehan endamên partî û şêniyên bajêr li dar xist.

Forumê bi rêzgirtinê dest pê kir. Piştre rêveberê Partiya Sûriyê ya Pêşerojê ya kantona Cizîrê Ehmed El-Eseed rewşa siyasî û leşkerî ya li herêmê nirxand. Her wiha jî bûyerên ku di ser gelê Sûriyê bi tevahî û Bakur û Rojhilatê Sûriyê re bi taybet, ji merheleyên koçberiya bizorê ya li ser şêniyên herêmê re derbas bûne û bandorên şer ên mezin li ser jin û zarokan jî şîrove kirin.

El-Eseed diyar kir ku komên çete, Idlib vegerand kaniya koçberiyê ji herêmên başûr û hundirê Sûriyê ku bi wê re jî bûn alav di destê dewleta Tirk û ajandeyên wê li herêmê de ku wek rêbazeke pêkanîna armancên xwe li Sûriyê, bi kar tîne.

El-Eseed bal kişand ser ku rewşa koçberiya bizorê hê jî li gel paşguhkirina dewletên cîhanê li ser kiryarên dewleta Tirk, berdewam e.

El-Eseed got tişta ku dewleta Tirk a dagirker û çeteyên wê ji komkujî û binpêkirinan pêk tîne, bi hedefa koçberkirina şêniyên resen û bicihkirina çeteyan li şûna wan e û her wiha jî da ku demografiya herêmê biguherin.

Rêvebera Partiya Sûriyê ya Pêşerojê Hindirîn Sîno li gel ajansa me ANHA’yê wiha anî ziman: "Koçberkirina ku çeteyên DAIŞ’ê yên terorîst li herêmên Bakur û Rojhilatê Sûriyê pêk dianîn, siyaseteke bimetod a piştevaniya Tirkiyê bû. Ew jî dema ku dewleta Tirk êriş bi nav û ala nû pêk anî eşkere bû, lê belê hedef heman e."

Hindirîn Sîno piştrast ku li Sûriyê mozaîk û hevsengiyeke hevgirtî di nava pêkhateyên gel de heye û wiha domand: "Dê ev jî rûyê rastîn ê Sûriyê vegerîne û dê alîkariya vegerandina koçberan a warên wan bike."

Forum bi pêşandana belgefîlmeke li ser jiyana siyasetmedar Hevrîn Xelef û xebata wê ji destpêka damezirandina Partiya Sûriyê ya Pêşerojê ve heta kêliya şehîdbûna wê bi destê çeteyên Tirkiyê, bi dawî bû.

(fr)

ANHA