Şehîda MLKP‘ê Sarya Ozgur li Kobanê hate bibîranîn

Ji bo şervana Partiya Marksîst Lenînîst Komunîst (MLKP) Sîbel Bulut (Sarya Ozgur) a ku sala 2014‘an di berxwedana Kobanê de şehîd bibû, merasîmê bîranînê li qada Jina Azad a Kobanê hate lidarxistin. Bi sedan şêniyên kantonê, di nav de endamên saziyên sivîl, Rêveberiya Xweseriya Demokratîk beşdarî merasîmê bûn.

Di merasîmê de wêneyên şehîd Sarya, alên Meclisa Malbatên Şehîdan û MLKP‘ê hatin hildan.

Merasîm bi deqeya rêzgirtin destpê kir. Piştre rêveberê MLKP‘ê Erdal Cîbo der barê berxwedana Kobanê ya li dijî çeteyên DAIŞ‘ê de axivî û diyar kir ku şervanên MLKP, YPG û YPJ‘ê di berxwedana Kobanê de efsanên qehremaniyê raber kirin, şehîdên mîna Arîn Mîrkan û bi dehan şehîdên din bûne sembolên vê berxwedanê.

Cîbo anî ziman ku Kobanê bi saya kedan şehîdan ewle bûye.

Rêveberê MLKP‘ê Erdal Cîbo got, ew ê bi berxwedanê dagirkeriyê têk bibin û ewlehî û aştiyê li herêmê vegerînin.

Di merasîmê de cîgirê Desteya Edaletê ya Herêma Firatê Bekir Cerada, endama Partiya Yekitiya Demokratîk (PYD) Rohat Mele Xelîl û hevserokê Meclisa Leşkerî ya Kobanê Ismet Şêx Hesen axivîn. Di axaftinan de berxwedana şervanan li Rojava ya li dijî êrişan hate silavkirin û doza şopandina rêya wan hate dûbare kirin.

Merasîm bi dirûşmeyên dilsoziya bi şehîdan re û silavkirina berxwedana jinan bi dawî bû.

ANHA