Pêkhateyên Til Temirê ji bo 2‘ê Mijdarê meşiyan

Bi hezaran şêniyên navçeya Til Temir bi Kurd, Ereb û Asûr ji bo 2‘ê Mijdarê Roja Cîhanî a Rojava meşiyan.

NÛÇE

2 mijdar, 2019 16:56

HESEKÊ

Bi hezaran şêniyên navçeya Til Temir bi Kurd, Ereb û Asûr ji ber avahiya Meclisa Malbatên Şehîdan ber bi Çarxereya Ş.Qendîl ve dest bi meşê kirin.

Di meşê de pankartên bi nivivîsên"2‘ê Mijdarê Roja Rojava a Cîhanê", "Her Der Rojava Her Der Berxwedan e", alên Kongreya Star û QSD‘ê hatin bilind kirin û diruşmeyên"Berxwedan Jiyan e", "Qatil Erdogan" û "Berxwedana Rûmetê bilind dibe" berz dikirin.

Meş li Çarxereya Ş.Qendîl rawestiya û deqeyek rêz hate girtin. Piştre endamê Meclisa navçeya Til Temir Ebdilrehman Hisên axivî.

Hisên berxwedana Kobanê bibîr xist û ev yek anî ziman:"Berxwedana Kobanê hemû planên hêzên hegemon û dîktator li ser gelê herêmê şikandin û li cîhanê denge veda. Gelê Herêma Bakur û Rojhilatê Sûriyê dikarîbûn bi têkoşîn û berxwedana xwe nêrîna cîhanê ji xwe re bidin guhertin. Bi saya ewqase berxwedanî proje û şoreşa me ji cîhanê û Rojhilata Navîn re dibe nimûne. Ka em bi hev re asta têkoşînê bilind bikin û dagirkeran ji ser xaka xwe biqewitînin û dawî li faşîzmê bînin."

Meş bi diruşmeya"Berxwedan Jiyan e" bi dawî bû.

ANHA