Li Dêrazorê rêbazê xurtkirina parastinê hate nîqaşkirin

Li ser banga Meclisa Sivîl a Dêrazorê civîneke berfireh ji bo nirxandina rewşa dawî û guhdarkirina daxwazên welatiyan, hate lidarxistin. Civîn li hola civînan a herêma Kisrayê bi amadebûna endamên Meclisa Sivîl a Dêrazorê, Hêzên Koalîsyona Navdewletî û rûspiyên Dêrazorê hate lidarxistin.

Civîn bi deqeyeke rêzgirtin destpê kir. Paşê endamê Meclisa Serokatî ya Meclisa Sûriyeya Demokratîk (MSD) Hesen Mihemed Elî bi xêrhatina beşdaran kir û serkeftina QSD‘ê yên li dijî DAIŞ‘ê pîroz kir.

Mihemed Elî anî ziman ku serkeftina leşkerî avakirin bi dawî nabe û wiha domand: " Ji me tê xwestin ku me kedek hevpar pêk bînin da ku kaniya terorê zûha bikin û xebatên avakirina dewam bikin. Em ê ji cîhanê re îsbat bikin ku em dikarin bajarê xwe bi rêve bibin û bikin nimuneya biratiya gelan û aştiyê."

Mihemed Elî diyar kir ku hêzên ewlehiyê ji bo tinekirina şaneyên veşartî yên terorîstan kedeke mezin didin û bang li şênî û eşîreyên herêmê kir ku bi hêzên ewlekariyê re bibin hevkar da ku aştî û aramî xurt bibe.

Mihemed Elî wiha domand: "Em li pêşberî du pêvajoyan in, yek divê em hevkariya xwe xurt bikin da ku aramiyê bi afirînin, ya duyemîn jî pêvajoya jinûve avakirin û rêxistinkirinê ye. Li ser vî esasî em bang li kesên pirspor û zane yên civakê dikin ku ji bo serkeftina vê pêvajoya kar bikin."

Di dawiya civînê de beşdaran pirsgirêkên xwe anîn ziman û ji bo çareseririnê pêşniyar kirin. Her wiha diyar kirin ku erka mezin dikeve ser milê eşîreyan da ku civakî bi rêxistin bikin û pirsgirêkên civakê çareser bikin.

ANHA