Evîn Paşo: Berxwedana Leyla Guven rihê Newrozê nîşan dide

HESEKÊ

Piştî ku berpirsê Komîteya Têkiliyên Dîplomatîk a TEV-DEM`ê Aldar Xelîl axivî, pîrozbahiyên Newrozê ya Hesekê bi axaftina endama Koordînasyona Kongreya Star Evîn Başo dewam dike.

Di şahiyê de bi hezaran pêkhateyên bajarê Hesekê, ji Kurd, Ereb û Suryan bi cilên xwe yên folklorîk beşdar dibin.

Evîn Paşo di destpêkê de Newroz li gelên Bakur û Rojhilatê Sûriyê pîroz kir û destnîşan kir ku beşdarbûna hemû pêkhateyan rihê biratiya gelan di bin neteweya demokratîk de dide diyarkirin.

Evîn Paşo da xuyakirin ku berxwedana ku Leyla Guven dimeşîne û dewama greva birçîbûnê ji bo tecrîda li ser Rêberê Gelê Kurd Abdullah Ocalan nûnertiya rihekî nû yê berxwedana Newrozê û Kawayê Serdemê Mazlûm Dogan dike.

Her wiha Evîn da xuyakirin ku piştî rizgarkirina Baxozê dê merheleya aştiyê bi rêya danûstandinan pêk were û wiha got: "Lê dê kêm bimîne, ji ber ku Efrîn hîna rizgar nebûye û tecrîda giran a li ser Rêberê Gelê Kurd Abdullah Ocalan neşikestiye."

Evîn Paşo di dawiya axaftina xwe de wiha got: "Bi rihê Newrozê û îradeya azad û biratiya gelan û Berxwedana Serdemê dê tecrîda Îmraliyê bişikê."

Tê payîn ku daxuyaniyek bi navê partiyên kantona Hesekê bê dayîn.

(jo)

ANHA