Zarokên êzidî serpêhatiyên biêş ên 5 salan vedibêjin

Zarokên êzidî yên ku ji çeteyên DAIŞ`ê hatine rizgarkirin, destnîşan kir ku çeteyan li wan dida, çeld dikirin û gotin: “Ji bo ku bibin `Eşbalên Xîlafetê` bi darê zorê ew neçarî perwerdeyên leşkerî, olî û girtina îslamê dikirin."

26 sibat, 2019 07:29

NESRÎN ELÎ / HESEKÊ

Di 3’yê Tebaxa 2014’an de çeteyên DAIŞ’ê êrîşî Şengalê kir. Di êrîşan de bi hezaran kes qetil kirin, bi hezaran jin û zarok revandin û birin herêmên dagirkirî. DAIŞ’ê fikrên tarî yên tundraw di serê wan de diçandin, ew mecbûrî ola îslamê dikirin. Zarok jî bi navê “Eşbalên Xîlafetê” perwerde dikirin.

QSD’ê di qonaxa dawîn a pêngava Bagera Cizîrê ya bi navê Şerê Tunekirina Terorê de bi sedan jin û zarokên êzidî rizgar kirin. Herî dawî 11 zarokên êzidî ji lepên çeteyên DAIŞ’ê hatin rizgarkirin.

Zarokê bi navê Sedam Hisên ê 15 salî, ji gundê Dokrî yê Şengalê ye û yek ji 11 zarokên êzidî ye ku hatiye rizgarkirin. Sedam Hisên serpêhatiya xwe wiha vedibêje: “Dema çeteyan ez revandim, ez 10 salî bûm. Destpêkê ez birim Til Eferê, piştre jin, mêr û zarok ji hev cuda kirin û zarok bi tenê hiştin. Em di navbera Mûsil, Reqa û Hecînê de geriyam û herî dawî em hatin Baxozê."

Hisên got çeteyan bi darê zorê ew kirin misilman û wiha pê de çû: “Eger kesek li dijî çeteyan bisekiniya ew dixistin girtîgehan. Di wir de fikrên tundraw di serê wan de diçandin. Em di kampên leşkerî de diman û em di aliyê fikrî û leşkerî de perwerde dikirin. Fikrên xwe yên kirêt fêrî me dikirin.”

Sedam Hisên wiha dewam kir: "Bi alîkariya Mala Êzidiyan a Cizîrê ez bi dayik, xwişk û birayên xwe re axivîm. Di demeke nêz de ez ê wan bibînim. Min pir bêriya wan kiriye."

Her wiha Sedam Hisên bi çavên tijî hêsir wiha domand: "DAIŞ`ê bavê min kuşt û heya 5 salan ez ji malbata xwe dûr xistim.”

‘Tişta tekane ku tê bîra min, rojane li min didan!’

Zarokê bi navê Iyad Hisên (10) ji gundê Herdanê yê Şengalê ye. Eyad Hisên nexweş e. Iyad Hisên wiha qala 5 salên dilîtiyê dike: “Nayê bîra min ku çawa ez çawan revandime. Ez wê demê 5 salî bûm. Rojane çeteyan li min dida. Tu agahiyên min ji malbata min tune ne. Ez nefretê ji DAIŞ`ê dikim, ji ber ku ez revandim û ez ji malbatê dûr xistim.”

Têkildarî tenduristiya zarokan bijîşk û endamê Heyva Sor a Kurd Diyar Reşo ji ajansa me re axivî. Reşo destnîşan kir ku ji ber nebaşbûna xwarinê hinek nexweşî li zarokan peyda bûne.

Reşo got wan rewşa tenduristiyê ya zarokan kontrol kiriye, lê ji ber nêzîkatiyên çeteyan bi wan re pirsgirêkên derûnî çêbûne.

(şx/bm)

ANHA