Dê 25 hezar zarok li gundên Reqayê bên aşlekirin

Navendên tenduristiyê yên gundên rojhilatê Reqayê bi hevkariya Komîteya Tenduristiyê ya girêdayî Meclisa Sivîl a Reqayê û Rêxistina Tenduristiyê ya Cîhanê, îro sibehê dest bi aşlekirina zarokan li dijî nexweşiya felcê kir.

10 sibat, 2019 11:30

REQA

Komîteya Tenduristiyê 3 navendên tenduristiyê li bejahiya rojhilatê Reqayê anku li El-Hemrat, El-Keramê û El-Hos vekirin û her navendek gelek noqteyên tenduristiyê girêdayî wê ne. Her wiha tîmên gerok di nava tax û gundên dûr de digerin da ku zarokan aşle bikin.

Di pêngava aşlekirinê de, zarokên yekrojî heta 5 salî tên aşlekirin. Ev yek bi rêveberiya kadroyên tenduristiyê tê kirin.

Endamê rêveberiya Navend Tenduristiyê ya El-Keramê Yûnis El-Neyîmî wiha got: "Em zarokan aşle dikin, Komîteya Tenduristiyê dermanên aşlekirinê radest kirin, kadroyên tenduristiyê jî zarokan aşle dikin. Hin noqteyên sabît hene û hin tîmên gerok jî di nava taxên bajarokan de hene. Em daxwazê ji welatiyan dikin ku alîkariya me bikin da ku em hemû zarokan aşle bikin."

Dê pêngav heta 5 rojan dewam bike û dibe ku hîn dirêj bibe. Li gorî serjimariya Komîteya Tenduristiyê 25 hezar zarok hene û dê hemû bêne aşlekirin.

(jo)

ANHA