‘Divê hesab ji qatilên jinan were xwestin‘

Kongreya Star a navçeya Şedadê piştî ku li bajarokê Mergeda jinek hate qetilkirin, bang li aliyên peywendîdar kir ku hesab ji qatilên jinan bixwazin.

16 kanûn, 2018 12:10

HESEKÊ

Li gundê Şemsane yê girêdayî bajarokê Mergeda yê navçeya Şedadê, cenazeyê dayika bi navê Hemda El-Hawas ku dayika 3 zarokan e, hate dîtin û heta niha nehatiye zanîn bê ka ji aliyê kê ve hatiye qetilkirin.

Di vê çarçoveyê de Kongreya Star a navçeya Şedadê bi daxuyaniyekê qetilkirina jinan şermezar kir û bang li aliyên peywendîdar kir ku hesab ji qatilên jinan were xwestin.

Daxuyanî ji aliyê rêvebera Kongreya Star Nîda El-Salih ve hate xwendin.

Kongreya Star di daxuyaniya xwe de qetilkirina jinan şermezar kir û destnîşan kir ku ew qetilkirina jinan bi tundî şermezar dikin, tu girêdanên wan bi mirovahiyê ve tune ne û ne qanûn ne jî kevneşop vê yekê qebûl nakin.

Jinan di daxuyaniya xwe de got ew tu carî der barê qetilkirina jinan de bê deng namînin û bang li aliyên peywendîdar kir ku lêkolînê der barê qetilkirina jinan de dest pê bikin û hesab ji qatilên jinan û kesên ku dixwazin ewlehiya herêmê tevlihev bikin, bixwazin.

(bx)

ANHA