Meclisa Giştî ya Rêveberiya Xweser rêbazên kar gotûbêj dike

GIRÊ SPÎ

Meclisa Giştî ya Rêveberiya Xweser a Bakur û Rojhilatê Sûriyê piştî civîna sûndxwarinê ya di 6'ê Îlona borî de yekemîn civîna xwe li navenda Meclisa Sûriya Demokratîk (MSD) a navçeya Eyn Îsa ya girêdayî kantona Girê Spî li dar xist.

Meclisa Giştî 6'ê Îlona borî  fermî hate damezirandin û ji 70 endaman pêk tê ku nûnertiya 7 rêveberiyên xweser ên Bakur û Rojhilatê Sûriyê dikin û 49 endamên Meclisa Zagonsaz ên herêmên Rêveberiya Xweser û Meclisên sivîl û 21 endamên teknokrat pêk tê.

Di civînê de endamên Meclisa Giştî ya Rêveberiya Xweser a Bakur û Rojhilatê Sûriyê û hevserokê meclisê Sîham Qeryo û Ferîd Etî beşdar bûn. Civîn bi deqeyeke rêzgirtinê dest pê kir. Piştre hevseroka meclisê Sîham Qeryo bixêrhatina endaman kir û wiha got: "Tişta ku dîrok dinivîsîne ew e ku em nûnerên hemû pêkhateyên bakur û rojhilatê Sûriyê di heman salonê de civiyane."

Sîham di axaftina xwe de diyar kir ku buhayê aloziya Sûriyê gelê Sûriyê dide û dewletên herêmî ku behsa çareseriyan dikin bêyî beşdarkirina gelê Sûriyê li gorî berjewendiyên xwe çareseriyan pêşkêş dikin.

Sîham da zanîn ku em tu carî xwe naspêrin hêzên derve û hêza wan hemû pêkhateyên gelê Sûriyê ne û wiha domand: "Destewerdana Amerîka û hêzên koalîsyonê piştî berxwedana YPG'ê û YPJ'ê li Kobanê pêk hat."

Di civînê de her wiha hevserokê meclisê Ferîd Etî axivî û behsa bernameya rûniştinê kir û tê de sîstema avakirina komîteyên qanûnî yên meclisa giştî û komîteya amadekar a amadekirina rêziknameya hundirîn a Meclisa Hundirîn kir. Piştre deriyê nîqaşê li pêşiya beşdaran der barê belgenameya meclisê de hate vekirin.

Piştî nîqaş û dengdayînê, beşdaran li ser sîstema rûniştandinê ya nîvmehane li hev kir ku mehane 2 civîn bêne lidarxistin, ango di 1 û 15'ê her mehê de.

Her wiha Komîteya Qanûnî ya Meclisa Giştî ku ji 3 kesan pêk tê, hate damezirandin û peywira wê ew e ku qanûn û pîvan û pêşniyaran ji rêveberiyan û gel pêşkêş bike û lêkolîn bike. Her wiha qanûnên ku ji meclisên tên derxistin lêkolîn bike û hejmareke endaman ji bo heman mijarê erkdar bike.

Beşdaran di rûniştina xwe de Komîteya Amadekirina Rêziknameya Hundirîn a Meclisa Giştî ava kir û ev komîte jî ji nûnerên Desteyên Zagonsaz û 7 rêveberiyên xweser pêk tê.

Civîn bi nîqaşên der barê belgenameya Meclisa Giştî de bi dawî bû. Tê payîn ku rûniştina duyemîn a Meclisa Giştî di 1'ê mijdarê de were lidarxistin.

ANHA