Şaredariya Til Hemîsê bê navber xebatan pêşkêş dike

ŞIHAB EL-EHMED / QAMIŞLO

Bi nêzîkbûna zivistanê re şaredariyên gel ên herêma Cizîrê bi hemû beşên xwe re gelek xebatên xizmetguzariyê pêşkêş dikin.

Beşa Hawîrdorê ya Şaredariya Gel a navçeya Til Hemîsê ya kantona Qamişlo ya herêma Cizîrê, beşek mezin ji çop û komên sergoyê di meha Îlonê de veguhastin derveyî navçeyê. 

Têkildarî xebatên paqijiyê, rêveberiya şaredariyê tekez kir ku ji ber kêmasiya alavên xizmetguzariyê û paqijiyê gelek zehmetiyan di bicihanîna hin xebatan de dikişînin. Bi taybet çopên ku li nav taxan kom bûne. Karkerên paqijiyê rojane û bi awayekî domdar û bi derfetên heyî dixebitin û taxên navçeyê paqij dikin.

Her wiha rêveberiya şaredariyê destnîşan kir ku cihê çopê bi 15 km ji herêmê dûr e. Ji ber wê xebatên alavên paqijiyê dereng dimînin û gelek demê jî dixwe.

Têkildarî projeyên ku Şaredariya Gel a navçeya Til Hemîsê dê pêk bîne, rêveberiya şaredariyê diyar kir ku şaredarî tevî hemû beşên xwe dê gelek projeyan bi cih bînin, jê sererastkirina rêyan û avakirina rêyên nû wekî Rêya El-Qeyrewan El-Siyasî bi dirêjahiya 30 km, Rêya Kalo 2 hezar û 160 m başûrê Til Hemîsê, sererastkirina çalên Rêya Siyasî û qîrkirina wan û gelek xebatên xizmetguzariyê têkildarî toreyên kanalîzasyonê.

Tê payîn ku şaredarî di destpêka meha Cotmehê de dest bi bicihanîna projeyan bike.

(şx)

ANHA