Herêma Efrîn sazûmaniya rêveberiya xweser ji nû ve saz dike 

ŞEHBA

Civîn li Kampa Serdem a Kantona Şehbayê hate lidarxistin.

Zêdetirî hezar û 200 kes, di nav de rûspiyên êlên Ereb û Kurd ên Efrîn û Şehbayê, nûnerên partiyên siyasî û nûnerên deste û saziyên Rêveberiya Xweseriya Demokratîk û Meclisa Kantona Şehbayê beşdarî civînê bûn.Piştî deqeyek rêzgirtin, hevsroka Meclisa Damezrîner a Federaliya Demokratîk a Bakurê Sûriyeyê Hediya Yûsif axivî û diyar kir ku biryara jinûvesazkirina sazumaniya Rêveberiya Xweseriya Demokratîk a herêmê, ji bingeha nîqaş û pêşniyarên konferansên Rizgarkirina Efrîn û Rêveberiya Kantona Şehbayê hat.

Hediya Yûsif wiha domand: `Di nav şert û mercên awart de yên Kantona Şehbayê û dagirkirina Efrînê û ji bo parastina ewlehiya herêmê, pêwîstî bi lidarxistina civînek berfireh û hilbijartinan hebû, da ku hibijartin demokratîk û wekhevî be divê hemû nûnerên hemû pêkhateyên herêmê tev li hilbijartinan bibin.`

Hediya destnîşan kir ku di hilbijartinan de dê hevserokên meclisên rêveber û zagonsaz ên herêmê li gorî hindek şert û mercan bên hilbijartin; divê bi fikr û rêgezên netewa demokratîk bawer bin, xwedî kesayetên berpirsyar û divê amade bin du ku xizmeta gel li her derê û di nav hemû şert û mercan de bikin.

Piştre deriyê dayîna navên namzetiya desteyên rêveber ên Kantonên Efrîn û Şehbayê hate vekirin. 200 kes navên xwe dan. Piştî naskirina namzetan dengdan dest pê kir.

Di van kêliyan de endamên Komseriya Bilind a Hilbijartinan a her du kantonan Efrîn û Şehbayê dengan dihêjmêrin û dê di saetên pêşiya me de encamê hilbijartinan bê ragihandin.

Tê payîn ku ji bo rêvebirina desteyên Rêveberiya Xweseriya Demokratîk ên her du kantonên Efrîn û Şehbayê 24 kes bên hilbijartin.

(şx)

ANHA