Mala Jin a Eyn Îsa xebatên birêxistinkirina jinan didomîne

SEMÎRA DAWÛD / GIRÊ SPÎ

Rola Mala Jin a navçeya Eyn Îsa ya kantona Girê Spî di birêxistinkirina jinan û pêşxistina hişmendiya wan de sereke ye. Mala Jin bi hevkariya Kongra Star re perwerdeyên fikrî û bîrdozî organîze dike da ku hişmendiya jinan pêş bixîne û ji zihniyeta baviksalariyê rizgar bike. Mala Jin her wiha bi hemû hêz û derfetên xwe baweriyê li ba jinan çê dike û gelek projeyên taybet ji wan re peyda dike.

Mala Jin a navçeya Eyn Îsa avakirina komînên jinan di hundirê navçeyê de bi dawî kirin. Di navçeyê de 5 komîn hatin ava kirin.

Mala Jin niha bi hevkariya Kongra Star li gund û bajarokên girêdayî navçeyê digerin û bi jinan re dicivin da ku rola jinan aktîf bikin û wan beşdarî perwerdeyên pêşxistina hişmendiyê bikin.

Mala Jin yekemîn civîna xwe li gundê El-Hêşa ya başûrrojhilatê navçeya Eyn Îsa lidar xist û dê li gundên din jî civînên xwe li dar bixe û têde rêgezên kongra Star şîrove bike.

Di civînê de endamên Mala Jin bi beşdarên jin re gotûbêjên xwe kirin û behsa pêwîstî û pêdiviyên jinan kirin. Endamên Mala Jin soz dane jinên gund ku dê alîkariya wan di projeyên dirûtinê de bikin û niha dê dewreyên xwendin û nivîsandinê û kompyuter ji jinan re vebikin.

Girêdayî mijarê Endama Rêveberiya Mala Jin a gundê El-Hêşa Kefa El-Ebo got ku armanca wan ji van serdanan ew e ku jinan beşdarî perwerdeyên pêşxistina hişmendî bikin da ku xwe ji zihniyeta baviksalariyê rizgar bikin. Kefa El-Ebo da zanîn ku dê li gorî derfetên xwe dewreyên perwerdeyê vebikin.

Endama Kongra Star a gundê El-Hêşa Menal El-Ehmed got ku hejmara jinên beşdarî semîner û perwerdeyan dibin rojane zêdetir dibin.

(jh)

ANHA