Kedkarên Kobanê di Ceja Karkeran de Berxwedana Serdemê silav kirin

KOBANÊ

Bi boneya Cejna Karkeran a Cîhanî meşek li dar xistin. di meşê de bi hezaran şêniyên Kantona Kobanê bi hemû pêkhateyên xwe yên Kurd, Ereb û Tirkmen, kedkar, her wiha endam û rêveberên saziyên sivîl û desteyên Rêveberiya Sivîl a Demokratîk amade bûn.

Meşvanan ala Tevgera Civaka Demokratîk (TEV-DEM), wêneyên Rêberê Gelê Kurd Abdullah Ocalan, her wiha pankartên "Bijî berxwedana 1ʹê Gulanê, bijî Berxwedana Serdemê, berxwedana Efrînê berxwedana kedkaran e" hildan.

Meşvan li hemû kolanên sereke yên bajar geriyan û dirûşmeyên ʺBijî berxwedana YPJ/YPGʹêʺ  berz kirin.

Meş li Qada Şehîd Egîd veguherî mitîngê. Mitîng bi rêzgirtinê dest pê kir. Paşê Hevserokê Meclîsa TEV-DEMʹê ya Kobanê Ehmed Şêxo, Endama Kongreya Star Edla Begê axivîn û cejna Karkerên Cîhnê li hemû karker û kedkaran pîroz kirin. Axaftvanan diyar kirin ku civak bi saya karkeran tê avakirin.

Her wiha di axaftinan de hate destnîşankirin ku Berxwedana Serdemê hêza xwe ji keda kedkar û zarokên ku bê navber ji bo avakirina civakê dixebetin, digre. Her wiha hate zanîn ku hemû kedkar li ser riya şehîdên ku ji bo azadiya gel û welatê xwe canê xwe feda kirin, dimeşin.

Paşê nameya Saziya Biratiya Gelan derbarê 1ʹê Gulanê roja berxwedanê li hember zilm û zorê de hate xwendin. Di nameyê de hate gotin ku dewleta Tirk a dagirker bi her awayî dixwaze îradeya gelê herêmê (taybet gelê Efrînê) bişkîne û kiriyarên hovane derbarê gelê me pêk tîne. Ji ber wê em ê roja 1ʹê Gulanê bikin roja tekoşîn û berxwedana li dijî dewleta Tirk a faşîst, em ê hemû planên wan têk bibin."

Di dawiyê de komên hunerî yên Navenda Baqî Xido stran û şano pêşkêş kirin.

(bx)

ANHA