Şervana YPJ’ê Şehîd Narvîn Hogir hat oxirkirin

Şervana YPJ’ê Narvîn Hogir (Dîlan Derwêş) ku 22’yê Nîsanê li ser rêya navçeya Sirin a Kantona Firatê di encama qezaya seyareyê de şehîd bibû.

Narvîn Hogir a ji bajarê Qamişlo, îro li Pakrewangeha Şehîd Delîl Saruxan a li Qamişlo bi merasîmeke girseyî hat oxirkirin.

Di merasîma ku bi deqeyeke rêzgirtin dest pê kir de Endama Meclisa Malbatên Şehîdan Necah Gulo axivî û sersaxî ji hemû malbatan xwest.

Endamê Kongra Îslama Demokratîn Casim El-Salih jî sersaxî ji malbata şehîd xwest û bal kişand ser wateya şehadetê ya di ola Îslamê de.

Li ser navê hêzên leşkerî jî Mihemed Nezîr Sofî axivî û da zanîn ku ew ê li hemberî hemû êrîş, nokarî û xayintiyê têkoşîna xwe bidomînin, tu kes jî wê nikaribe îradeya gel bişikîne.

Bavê Şehîd Narvîn Hogir Mihemed Sîrac destnîşan kir ku ew bi zaroka xwe serbilind in û dê rêya wan bişopînin.

Piştî axaftinan wesîqeye şehîd hat xwendin û radestî malbatê hat kirin.

Di dawiya merasîmê de cenazeyê Şehîd Narvîn Hogir bi dirûşme û tîlîliyên dayikan spartin axê.

Ji bo şehîd Narvîn Hogir wê saet di 17.00’an de li taxa Hilko konê sersaxiyê bê vedan.

(eg-ta/a)

ANHA