Sersaxî ji malbata şehîd Nacî El Şercî re hate xwestin

Şêniyên Qamişloyê sersaxî ji malbata endamê Hêzên Erka Xweparastinê şehîd Nacî El Şercî yê ku di 29`ê Mijdarê de di encama êrişa komên girêdayî hikumeta Şamê de li Dêrazorê şehîd bûbû, xwestin. 

Konê sersaxiyê li pêşiya Goristana Şehîd Delîl Saroxan a li bajarê Qamişlo hate vedan. Di merasîmê sersaxiyê de endama Meclisa Malbatên Şehîdan Fatma El Casim axivî û diyar kir ku wan li hemberî êrişên dijî herêmên Bakur û Rojhilatê Sûriyeyê isbat kiriye ku ew ji şer û rijandina xwînê hez nakin û her dem hemû pêkhate xwe diparêzin û wiha pê de çû: “Em ji felsefeya Rêber Abdullah Ocalan fêr bûne û heta dawiyê jî em ê parêzvanên welatê xwe bin.”

Endama PYD`ê şaxê Qamişlo Semîra Mihemed axivî û bal kişand ser pêvajoya heyî li cîhanê û da zanîn ku Rojhilata Navîn di kirîzekê de, hêzên desthildar li dû berjewendiyên xwe ketine, dixwazin sînorên xwe nû bikin û gelên herêmê jî jê bê par bihêlin.

Semîra destnîşan kir ku di vê rewşê de ji gelan têkoşîn tê xwestin da ku hebûna xwe isbat bike û wiha dom kir: “Cihê ku şehîd lê hene, şoreş jî lê heye. cihê ku girtin lê hebe divê têkoşîn jî hebe.”

Endama Kongra Star Yasmîn Îsa jî axivî û got: “Şehîdên me ji bo me meşeleya ronahiyê û cihê serbilindahiyê ne.”

Merasîmê sersaxiyê bi serdana şêniyan û slogana `Şehîd Namirin` bi dawî bû.

(sb)

ANHA