Şehîdên Hefteya Lehengiyê li Helebê hatin bibîranîn

Bi boneya Hefteya Lehengiyê Tevgera Civaka Demokratîk (TEV-DEM) li hola civînan a Navenda Şehîd Gelhat a li rojhilatê taxa Şêxmeqsûd a Helebê semînerek li dar xist. Şênî û endamên saziyên sivîl û partiyê tev li semînerê bûn.

Di semînerê de endama rêveberiya Yekitiya Mala Êzidî Rûşîn Musa axivî û îşaret bi girîngiya vê hefteyê di dîroka Partiya Karkerên Kurdistanê (PKK) û doza Kurd de kir û got: "Pêvajoyeke girîng bû. Têkoşîn, di wê pêvajoyê de derbasî qonaxeke din a bidestxistina destkeftiyan bû."

Rûsîn destnîşan kir ku bi saya berxwedaa girtîgehan û ragihandina şerê çekdarî ji aliyê şehîd Egîd ve, gelê Kurd serî li hember pergalên serdest û siyasetên wan ên hovane hilda û wiha domand: "Bi wê berxwedanê me xwe nas kir û dawa mafên xwe yên bindest kir."

Rûşîn soz da ku li ser şopa şehîdan bin heta ku azadiya fîzîkî ya Rêber Abdullah Ocalan pêk were û got: "Şehîdan gava yekemîn avêtin, em jî dê rêya wan li ser bingeha fikr û felsefeya Rêber Abdullah Ocalan berdewam bikin. Heta mafên xwe bi dest nexist, em gav paşde navêjin."

Di dawiyê de sînevîzyonek têkildarî jiyana Rêber Abdullah Ocalan û têkoşîna şehîd Egîd (Mahsûm Korkmaz) û Mazlûm Dogan hate pêşandan.

(şx)

ANHA