Şehîd Mihemed Silêman li Tirbespiyê hate oxirkirin

Bi sedan xelkê Tirbespiyê cenazeyê şehîd Mihemd Silêman spart axê. Mihemed Silêman duh di bombebarana balafireke bêmirov a dewleta Tirk a dagirker li dijî erebeya wî li bajarokê Til Marûf ê li başûrê Tirbepiyê de şehîd bûbû.

Şehîd Mihemed li Goristana Şehîd Dilşêr a gundê Gugirê hate oxirkirin. Di merasîmê de endamê rêvebera Meclisa Malbatên Şehîdan a Tirbespiyê Mihemed Zekî Îbrahîm axivî û wiha got: "Em baş dizanin ku êrişên artêşa Tirk a dagirker li dijî yekitî û hevgirtina me ne û hewl dide vîna gelê me bişikîne. Lê bi saya fedakariyên vî şehîdî û hevrêyên wî em ê têkoşîna xwe bi çi berdêlî dibe bila bibe dewam bikin."

Li ser navê Hêzên Erka Xweparastinê yek ji rêveberan Dilbirîn Ferho axivî û got: "Em soz didin gelê xwe ku em ê têkoşînê dewam bikin û di oxira parastina destkeftiyên Şoreşa Bakur û Rojhilatê Sûriyeyê û pêşxistina projeya demokratîk de her tiştî bikin. Êrişên dewleta Tirk li pêş têkoşîna me nabin bend, berovajî wê em soz didin şehîdên xwe em ê tola wan hilînin."

Ferho anî ziman ku artêşa Tirk a dagirker di êrişên xwe de hewl didin derbe li ewlehî û îstîqrara Bakur û Rojhilatê Sûriyeyê bixin û ew wek hêzên leşkerî li ser soza xwe ne ku ewlehî û îstîqrarê peyda bikin.

Dûre wesîqeya şehîd hate xwendin û di nava tilîliyên dayikan de hate oxirkirin.

(fr)