Şaredariya Amûdê piştî rexnedayînê dest bi xebatên paqijiyê kir

Şaredariya Gel a Amûdê dest bi paqijkirina taxên bajarê Amûdê kir piştî ku di vê dawiyê de kêmasî ketibû karê wê.

ROJANE

26 hezîran, 2024 13:40

QAMIŞLO

Şaredariya Gel a bajarê Amûdê duh bi daxuyaniyekê xwe rexne kiribû ku di encama hin sedeman de di çend rojên dawîn de kêmasî ketibû karê wê û aşkera kiribû ku dê dest bi paqijkirina bajêr kir.

Karkerên paqijiyê, hevşaredar, endamên wê û yên Desteya Çandiniyê û Avê ya Kantona Cizîrê ji pêşiya avahiya şaredariyê dest bi paqijkirinê kirin.

Rêyên sereke, şaxî yên bajêr hatin paqijkirin. Çop hatin rakirin û bi rêya wesayîtên ku şaredariyê kirê kirine, derxistin derveyî bajêr.

Girêdayî mijarê hevşaredarê Amûdê Mihemed El Omerî got: "Ji ber ku wesayîtên şaredariyê rawestiyabûn, çop li bajêr kom bû. Me rexneya xwe da û ji bo ku em kêmasiyên xwe derbas bikin, îro me dest bi paqijkirinê kir. Ji bo ku em çopê ji bajêr derxin û ji ber ku wesayîtên me naxebitin, me hin wesayît kirê kirin û li endamên her 4 komînên bajêr belav kirin.”

Li gorî El Omerî, xebatên paqijkirinê berdewam in ta ku bajar bi temamî pak dibe.