Pîrozbahiyên Newrozê li kantona Cizîrê dewam dikin

Şêniyên bajarên kantona Cizîrê Newroza 2025’an bi coşeke mezin û bi vîna berxwedan û têkoşînê bi rêzeçalakiyan pîroz dikin.

ROJANE

19 adar, 2025 15:15

NAVENDA NÛÇEYAN

Pîrozbahiyên Newrozê li seranserî herêmên Bakur û Rojhilatê Sûriyeyê berdewam dikin. Li gelek bajaran şahî hatin lidarxistin, şano û konser hatin lidarxistin û şêniyan govend gerandin.

AMÛDÊ

Li Dibistana Seretayî ya Nîzam Eldîn a bajarê Amûdê şahiyek hat lidarxistin. Şagirt û mamoste beşdar bûn.

Pîrozbahiyê bi rêzgirtinê dest pê kir, dûre agirê Newrozê hat pêxistin û li ber stranan govend hate gerandin.

Akademiya Şehîd Eqîda ya li Amûdê jî bi amadebûna endamên jin ên akademiyê û jinên kantona Cizîrê pêşangeheke hunerên destan li avahiya akademiyê vekir.

QAMIŞLO

Komîteya Amadekar a pîrozbahiya Newrozê ya Qamişloyê li kolanên bajêr belavok belav kirin û bang li gel kir ku beşdarî pîrozbahiyên Newrozê bibe.

Dayikên şehîdan û endamên komîteya amadekar a Newrozê li sûkê belavok li welatiyan û xwediyên dikanan belav kirin.

Di belavokan de cih, roj û saeta pîrozbahiyê hatin diyarkirin.

Desteya Kar û Barên Hundirîn a kantona Cizîrê li ber Navenda Mihemed Şêxo ya Çand û Hunerê ya Qamişloyê şahiyek li dar xist. Şêniyên bajêr bi cil û bergên gelêrî beşdarî şahiyê bûn.

Agirê Newrozê ji aliyê hevseroka Desteya Kar û Barên Hundirîn a kantona Cizîrê Îlham Hesen Ebdullah ve hat pêxistin.

Di heman çarçoveyê de Zanîngeha Rojava li hewşa zanîngehê şahiyek li dar xist û xwendekaran agirê Newrozê pêxist.

ÇILAXA

Li bajarê Çilaxa Dibistana Şehîd Nocan a gundê Dêrûna Axê şahiyek şahiyek li dar xist. Endamên rêveberiya dibistanan, mamosteyên dibistanê, xwendekar û malbatên wan bi cil û bergên xwe yên gelêrî beşdarî şahiyê bûn.

Di pîrozbahiyê de şano ji aliyê xwendekarên dibistanan ve hatin pêşkêşkirin. Di lîstikên şanoyê de berxwedana Hêzên Sûriyeya Demokratîk, Yekîneyên Parastina Gel (YPG), Yekîneyên Parastina Jin (YPJ) û gelên Bakur û Rojhilatê Sûriyeyê li dijî êrişên dagirkeriya Tirk ên li ser bendava Tişrînê hate vegotin.

HESEKÊ

Li bajarê Hesekê çalakiyên ji bo Newrozê berdewam in. Her wiha ji bo vexwendina şahiya Newrozê belavok hatin belavkirin.

Meclisa bajarê Hesekê îro ji bo vexwendina şahiya Newrozê ya ku dê li Bendava Rojava ya bajarê Hesekê bê lidarxistin, belavok li şêniyan belav kirin.

Her wiha Peymangeha Mamosteyan jî bi beşdariya bi sedan mamoste û xwendekaran li Dibistana Elî Bekir a taxa Kelasê şahiyek li dar xist.